Европын холбооны “Erasmus+” хөтөлбөрийн санхүүжилтээр “Establishment of Leather Hubs in Russia and Mongolia” буюу “Арьс, ширний сургалт, судалгаа инновацийн төв байгуулах” төсөл энэ оны нэгдүгээр сарын 15-наас хэрэгжиж эхлээд байна.
Уг төсөл нь “Erasmus+” хөтөлбөрийн Категори-2 буюу “Capacity building in Higher Education” буюу “Дээд боловсролын чадавхийг бэхжүүлэх” чиглэлд хамаарах юм.
“Арьс ширний сургалт, судалгаа инновацийн төв байгуулах” төслийн ерөнхий зохицуулагчаар Туркийн ЭГЭ их сургууль ажиллах бөгөөд Итали, Грек, Польш, Румын болон Латви Улсын арьс ширний төвүүд зөвлөх үүрэгтэй оролцох аж.
Төсөл хэрэгжүүлэх байгууллага нь Монгол Улсын ХААИС, ШУТИС болон “Арьс ширний үйлдвэрлэлийн холбоо” ОХУ-ын Улан-Үдэ хотын Дорнод Сибирийн технологи удирдлагын их сургууль, Бурядын ХАА-н Академи болон Худалдаа аж үйлдвэрийн танхим юм байна.
Төслийн зорилго нь арьс ширний салбарын R&D буюу судалгаа, хөгжүүлэлтийн хамтын ажиллагааг өргөжүүлэх, инноваци дамжуулах замаар үйлдвэр болон их дээд сургуулиудын хооронд гүүр болоход орших юм.
Төслийн зорилгыг хэрэгжүүлэхийн тулд Монгол Улсад -2, ОХУ-д 2, нийт дөрвөн сургалт, судалгаа-инновацийн төв LeatHub байгуулахаар төлөвлөжээ.
“LeatHub” төвийн үүрэг нь:
- Насан туршийн боловсрол олгох сургалтын хөтөлбөрийг хөгжүүлэх
- Сургалт явуулах
- Судалгаа боловсруулалтын ажлын үр дүн нэвтрүүлэлтийг дэмжих
- Европын их сургууль, судалгааны хүрээлэнгээс дэвшилтэт технологи, дахин инженерчлэл, инноваци, мэдлэгийг дамжуулах
- Сургууль, орон нутгийн үйлдвэр хоорондын зохицуулагч бүс нутгийн өртгийн сүлжээ бий болгох ажлыг дэмжих, ур чадварыг дээшлүүлэх, технологи дамжуулах
- Орон нутгийн этгээдийг олон улсын зах зээлд гаргах үйл ажиллагааг зохицуулагч глобал өртгийн сүлжээг бий болгох ажлыг дэмжих юм.
“LeatHub” төвөөр дамжуулан Европын орны түншлэгчдээс туршлага нэвтрүүлэх ажлыг зайн болон ганцаарчилсан сургалтын аргаар хэрэгжүүлж, web-conference хийх замаар харилцах аж. Түүнчлэн шаардлагатай тоног төхөөрөмжүүд, Европын орны эрдэмтэн, судлаачдын инноваци, бизнесийн туршлагын талаарх мэдээллийн сан, веб платформоор хангагдах бөгөөд веб платформ нь олон нийтэд нээлттэйгээр мэдээлэл солилцох боломжийг бүрдүүлэх юм байна.
Г.Эрдэнэ