“Улаанбаатар төмөр зам” ХНН-ээс тус байгууллагын даргаар ажиллаж байсан иргэн Л.Пүрэвбаатарын хууль бусаар эзэмшиж байгаа 1 тэрбум 484 сая хаусын талаар мэдээлэл хийлээ. Энэ үеэр тус байгууллагын Хууль зүйн албаны зөвлөх Х.Энхсүх ““УБТЗ” ХНН-ийн даргаар ажиллаж байсан иргэн Л.Пүрэвбаатар нь 2014 оны арванхоёрдугаар сард ТУЗ-ын шийдвэрээр тус байгууллагын даргаар томилогдсон. Даргын албанд томилогдсон энэ өдрөө Ерөнхий хорооны шийдвэргүйгээр, тухайн үеийн Төрийн өмчийн хорооны даргын үүргийг түр орлон гүйцэтгэгч Цогбаатартай контрактын гэрээ байгуулсан байдаг. Гэтэл Цогтбаатар гэдэг хүн нь “УБТЗ” ХНН-ийг төлөөлөх эрхгүй этгээд байсан. Хууль бус гэрээн дээр үндэслэн Л.Пүрэвбаатар нь өөртөө өндөр үнэтэй хаус худалдаж авч өгөх гэрээг барилгын компанитай байгуулсан. Энэ барилга нь 1.5 тэрбум төгрөгийн үнэтэй. Ингэхдээ төлбөрийг нэг дор шилжүүлсэн. Энэ бүх процесс Л.Пүрэвбаатар “УБТЗ” ХНН-ийн даргаар томилогдсноос хойш 20 хоногийн дотор болж өрнөсөн. Тиймээс тус байгууллагын эрх ашигт халдсан ноцтой үйлдэл гэж үзэж байна. Үүний дараагаар үүрэгт ажлаа хангалтгүй биелүүлсэн шалтгаанаар ажлаас нь халсан. Энэ тохиолдолд албаны орон сууцаа эргүүлж өгөх үүрэгтэй. Гэтэл 1.5 тэрбум төгрөгийн үнэ бүхий хаусыг эргүүлж өгөхгүй гэсэн. Тиймээс 2018 оны нэгдүгээр сард Хан-Уул дүүргийн Иргэний хэргийн анхан шатны шүүхэд хандсан. Гэтэл иргэн Л.Пүрэвбаатар байгууллагын эсрэг нэхэмжлэл гаргасан. Анхан шүүхээс Л.Пүрэвбаатарын талд шийдвэр гаргасан. Энэ шийдвэрийг манай байгууллага эсэргүүцэж, Нийслэлийн Иргэний хэргийн давж заалдах шатны шүүхэд хандахад шүүхээс Анхан шатны шүүхийн шийдвэрийн эсрэг шийдвэр гаргасан. Эндээс Улсын Дээд шүүхэд иргэн Л.Пүрэвбаатар гомдол гаргасан. Дээд шүүхээс “Иргэн Л.Пүрэвбаатар нь хувийн ашиг сонирхолын үүднээс хууль бусаар орон сууц авсан байна” гэж манай талд шийдвэр гаргасан. Шүүхийн шийдвэр 2018 оны сүүлчээр гарсан боловч өнөөг хүртэл орон сууцыг суллаж өгөхөөс татгалзаж байна. Албадан суллах шийдвэрийг 2018 оныд арванхоёрдугаар сард гаргасан боловч иргэн Л.Пүрэвбаатар энэ бүх ажиллагааг зогсоох, удаашруулах үүднээс Баянгол дүүргийн Анхан шатны шүүхэд дахин гомдол гаргасан. Энэ бүхэн нь Иргэний хэрэг хянан шийдвэрлэх тухай хуулийн тодорхой заалтыг зөрчсөн үйлдэл юм. Үүнээс болж ШШГЕГ-аас шүүхийн шийдвэрийг гүйцэтгэх боломжгүй болсон.

УБТЗ ХНН-ээс холбогдох байгууллагад удаа дараа гомдол гаргасан боловч үл хайхарч байна.

1000 вагонтой холбоотой асуудлын хувьд 2018 оны үйл ажиллагаатай холбоотой ачаа тээврийн эргэлт нэмэгдсэн. ААН-үүд вагон нэмэх хүсэлт гаргасан. Энэ дагуу 628 гаруй вагон худалдаж авсан.  

2018 оны долдугаар сард эдгээр вагон нь бүх зардлаа бүрэн нөхсөн. Одоо ашигтай ажиллаж байгаа” гэлээ.