Үндсэн хуульд нэмэлт, өөрчлөлт оруулах төслийг УИХ-ын ээлжит бус чуулганаар хэлэлцэж байна. Хэлэлцүүлгийн талаар УИХ-ын гишүүн О.Баасанхүү мэдээлэл хийлээ.

Тэрбээр “Үндсэн хуулийн нэмэлт, өөрчлөлт оруулах хоёрдугаар төслийг эхлүүлэхээр өчигдөр 60 хувийн ирцтэй хуралдсан. Ерөнхийлөгч Үндсэн хуульд нэмэлт, өөрчлөлт оруулах төслийн ажлын хэсгийн ахлагч нь юм. Тиймээс уг нь бараа бологч “жижигхэн” залуу З.Энхболд үгээ хэлээд, тэмдэглээд хоёр, гуравдугаар хэлэлцүүлэг рүү ороод явж байх ёстой. Гэтэл бүгдийг нь “төмсөг”-дчихлөө.  Учир нь 49 ЖДҮ-чин, 60 тэрбумчин, концессчин, хүн амины хэрэгтэн хүмүүс энд суугаад хэлэлцүүлэг хийж байна.

Тухайлбал, 1992 оны Үндсэн хуулийг батлахдаа 400 гаруй депутатууд яг энэ дэгээр явж байсан. Гэвч тухайн үед гэнэт бүлгийн хурал зарлаад нэг ч хүн асуулт асууж болохгүй шүү гэдэг чиглэл өгч байсан юм билээ. Энэ үгийг ч МАН-ынхан  хэлсэн. О.Баасанхүү үг хэлье гэхээр “Чи 30 цаг ярихын байна” гээд миний үг хэлэх эрхийг хассан. Тиймээс “Үндсэн хуулийн өөрчлөлтийг улс төрийн тохиролцоо, нийгмийн наймааны хэрэгсэл байлгахаа боль” гэсэн уриалгыг би сандлынхаа ард тавьдаг. Өчигдөр энэ уриатай самбарыг оруулаагүй. Гэтэл өөрсдөө батлагдаагүй намын жижиг зүйлээ авчираад тавьчихсан байна.

Эд нар гишүүдийн тоог 108 болгоё гэж тохирсон байсан. Учир нь ирэх арваннэгдүгээр сарын 26-ны өдөр тусгаар тогтнолын 108 жилийн ой тохионо. Үүнийг ашиглан тусгаар тогтнолоо баталгаажуулах 108 гишүүн гэж хэлээд сонгууль хийх гэж байсан юм.

Нэг үгээр бол дарангуйллын тогтолцоо бий болох гээд байна. Ялангуяа ОХУ-ын Ерөнхийлөгчийг ирэхээс өмнө амжуулах гээд улайрч байна. Ирэхэд нь бид онцгой бүрэн эрхтэй боллоо гэж харуулах гэж байна. Тиймээс бид маш болгоомжтой, хянуур байх ёстой. Тусгаар тогтнолын асуудал яригдаж байна шүү дээ. Эцсийн дүнд Үндсэн хуулийн өөрчлөлт ШХАБ-аас болсон шүү. Үндсэн хуулийн өөрчлөлтөөр Ерөнхий сайд давуу эрхтэй болж, ШХАБ-руу явах гэж байгаа байхгүй юу. Үүнийг нь хэлсэн хүн бүр рүү дайрч байна” гэлээ.

Б.Лхам