Тээврийн цагдаагийн албанаас баярын өдрүүдэд хэрэгжүүлэх арга хэмжээний талаар мэдээлэл хийлээ.

Нийслэлд ердийн өдрүүдэд 136 цэгт 42 хөдөлгөөнт эргүүлийн автомашин, 430 алба хаагч гурван ээлжээр үүрэг гүйцэтгэдэг. Баярын өдрүүдэд алба хаагчдын тоог 80 алба хаагч, Дотоод хэргийн их сургуулийн 150 сонсогч нэмэгдүүлэн ажиллах аж.

Албан байгууллагуудын шинэ жилийн арга хэмжээ болж байгаатай холбогдуулан согтууруулах ундаа хэтрүүлэн хэрэглэхгүй байх, хэрэглэсэн үедээ тээврийн хэрэгсэл жолоодохгүй байхыг анхаарах шаардлагатай байна гэлээ. Учир нь энэ сарын эхний 20 хоногийн хугацаанд согтуугаар тээврийн хэрэгсэл жолоодсон 900 гаруй тохиолдлыг илрүүлснээс 30 гаруй нь бусдын эд хөрөнгө, амь насанд ноцтой хохирол учруулжээ. Тодруулбал, энэ сарын 24-нд дуудлагаар явж байсан түргэн тусламжийн автомашиныг согтуу жолооч мөргөсөн асуудал гарсан билээ. 

Мөн улсын хэмжээнд эхний арваннэгдүгээр сарын байдлаар согтууруулах ундааны зүйл хэрэглэсэн үедээ тээврийн хэрэгсэл жолоодсон 31367 зөрчил илрүүлснээс 25467 зөрчилд жолоодох эрх хасах, 13509 зөрчилд 7-30 хоног баривчлах шийтгэл оногдуулж ажиллажээ. Уг зөрчил гаргаж байгаа иргэдийн 70 орчим хувь нь 18-35 насных бөгөөд жолооч нар эзэлж байгаа аж.

ТЦА-ны Замын хөдөлгөөн зохицуулах хэлтсийн дарга Б.Батболд “Торгууль төлөлтийн байдал өнгөрсөн онтой харьцуулахад буурсан. Тиймээс үнэмлэхээ хаяад дахин захиалсан хүмүүст торгуулиа төлсөн байх шаардлага тавих зэрэг хязгаарлалтуудыг хийж эхэлсэн.

Камерын хяналтаар 142 удаагийн торгуультай тээврийн хэрэгсэл байсан.

Уг автомашиныг хайж олохоор банк бус санхүүгийн байгууллагын нэр дээр байдаг гээд төлдөггүй байсныг тухайн аж ахуйн нэгжийг шүүхэд хандах зарчмаар төлүүлэх холбогдох хяналт, шалгалтыг хийгээд бэлэн болсон. Он гараад энэ чиглэлээр тодорхой ажлуудыг хийнэ. Энэ оны хувьд хамгийн их буюу 56 торгуультай тээврийн хэрэгсэл байсныг тухайн этгээдийн гэрийн хаягаар олж тогтоон, торгууль төлүүлэх арга хэмжээ авсан. Жолооч бэлэн бусаар торгуульсныхаа дараа 14 хоногийн дотор сайн дураар төлөх үүрэгтэй” гэлээ.  

Б.Лхам