УИХ-ын чуулган 2019 оны арванхоёрдугаар сарын 20-ны өдрөөс хойш хуралдаж чадаагүй билээ. Тодруулбал, УИХ-ын Сонгуулийн тухай хуулийг баталсны дараагаар Эрүүгийн багц хуульд нэмэлт, өөрчлөлт оруулах асуудлыг хэлэлцэх ёстой байсан ч УИХ-ын гишүүд чуулганы хуралдааныг удаа дараа тасалсан юм.

Эрүүгийн багц хуулийн нэмэлт, өөрчлөлтөөр хөөн хэлэлцэх хугацааг дахин тоолж эхлэх зэрэг чухал заалтыг хэлэлцэх учиртай байсан ч чуулган тасалдуулсан гишүүдээс болж хэлэлцэх асуудал ийнхүү он дамжихаас аргагүй болсон. Харин энэ талаар МАН-ын бүлгийн дарга Д.Тогтохсүрэн "УИХ-ын гишүүд зун, намар амраагүй. Он солигдохоос өмнө тойрогтоо ажиллах хүсэлт гарсан. Энэ хүсэлтийн дагуу чуулганыг 2020 оны нэгдүгээр сарын 2-ныг хүртэл хойшлуулсан" гэж ангийханаа хамгаалсан тайлбар өгсөн. Тэгвэл УИХ-ын чуулган, байнгын хороод хуралдах тов гарсан байсан ч харамсалтай нь байнгын хороодын ирц хүрээгүйн улмаас эхнээсээ хойшлогдлоо. Тодруулбал, Хууль зүйн байнгын хорооны гишүүдийн ес нь гадаад болон дотоод томилолттой, хүндэтгэх шалтгаантай гэсэн учраас ийн хойшилсон байна. 

Тэгвэл УИХ-ын өнөөдрийн нэгдсэн чуулган өчигдөр 15.00 цагт эхлэх товтой байсан ч мөн л ирц хүрээгүйн улмаас эхлээгүй байна. Өнөөдөр мөн л 10.00 цагт эхлэх товтой байсан бол бас л Их хурлын гишүүд чуулган тасалснаар одоог хүртэл эхлээгүй байна.