УИХ-ын гишүүн Н.Номтойбаяр гишүүний бүрэн эрхийг түдгэлзүүлэх эсэх асуудлаар хуралдах Халдашгүй байдлын дэд хорооны хуралдаан ХХААХҮ-ийн сайд Ч.Улааны гадаад томилолттой холбоотойгоор хойшилсон билээ. Тэгвэл эл асуудлаар ХХААХҮ-ийн сайд Ч.Улаан тайлбар өглөө.

Тэрбээр "ХБНГУ-д жил бүрийн нэгдүгээр сард зохион байгуулагддаг Хөдөө аж ахуйн сайд нарын дэд хэмжээний уулзалт, “Ногоон долоо хоног” үзэсгэлэн яармагт оролцохоор энэ сарын 16-23 хүртэл ажлын айлчлалаар явсан.

Халдашгүй байдлын дэд хороогоор УИХ-ын гишүүн Н.Номтойбаярын бүрэн эрхийг түдгэлзүүлэх Ерөнхий прокурорын саналыг хэлэлцэхийг мэдэж байсан.

Тиймээс Герман руу явахаас өмнө хуралдая гэдэг саналыг дэд хорооны дарга, гишүүдээс хүссэн ч хуралдаагүй.

ХБНГУ-д зохион байгуулагдаж байгаа Хөдөө аж ахуйн сайд нарын дэд хэмжээний уулзалтад олон улсын Хөдөө аж ахуйн сайд нарын бага хурлыг удирдах байсан тул томилолтоо хойшлуулах боломжгүй байсан.

Тиймээс Халдашгүй байдлын дэд хороо хуралдахдаа ирцэнд авахыг хүсч өөрийн саналаа нууцын зэрэглэлтэйгээр энэ сарын 16-нд албан бичгээр хүргүүлсэн. Миний ажлын айлчлал Халдашгүй байдлын дэд хорооны хуралдаан хойшлох шалтгаан болох учиргүйг албан ёсоор хэлье" гэлээ. 

Г.Маргад