Шүүхийн тухай хуульд яаралтай өөрчлөлт оруулж, Шүүхийн ерөнхий зөвлөлийн бүтэц, зохион байгуулалтад өөрчлөлт хийхгүй бол шүүгчид даам гарлаа хэмээн Х.Нямбаатар сайд шүүмжлэв.  

Шүүгчид нүдэн дээр хууль зөрчин шүүгдэгчийн эрх ашигт үйлчлэн шийдвэр гаргаж байхад хариуцлагыг ярих учиртай байгууллага нь ямар ч чадамжгүй байгаад тэрбээр бухимдсан юм. Хамгийн сүүлд гэхэд л, С.Зориг агсны амийг хөнөөсөн хэргийн холбогдогчдыг эрүүдэн шүүсэн хэрэгт Тагнуулын дарга асан Б.Хурц, УЕП-ын орлогч Г.Эрдэнэбат нарын хүмүүсийг холбогдуулан шүүж, Төв аймгийн сум дундын Эрүүгийн хэргийн анхан шатны шүүхээс 2020 оны долоодугаар сарын 22-нд 1-3 жилийн хорих ял оноосон билээ.

Харин тэд анхан шатны шүүхийн шийдвэрийг эсэргүүцэн давж заалдсан юм. Энэ дагуу хэргийн Давж заалдах шатны шүүх хурал 2020 оны аравдугаар сарын 29-нд  Төв аймаг дахь Эрүүгийн хэргийн давж заалдах шатны шүүхэд болж анхан шатны шүүхийн шийдвэрийг бүхэлд нь хүчингүй болгож, хэргийг анхан шатны шүүхэд буцаах шийдвэрийг гаргасан. Ингэхдээ тэдгээрт авсан таслан сэргийлэх арга хэмжээг хэвээр үлдээсэн.

Харин Төв аймаг дахь сум дундын Эрүүгийн хэргийн анхан шатны шүүхийн шүүгч Ю.Энхмаа 2020 оны арваннэгдүгээр сарын 23-нд Цагдан хорих таслан сэргийлэх арга хэмжээг өөрчлөх тухай 1203 тоот захирамж гаргаж, Б.Хурц нарын долоон хүнийг сулласан билээ. Энэхүү шийдвэрт олон хүн шүүмжлэлтэй хандсан.

Х.Нямбаатар сайд ч ихээхэн бухимдан  “Эрүүдэн шүүсэн нь тодорхой байхад Төв аймгийн шүүгч Энхмаа хэргийг мөрдөн байцаалтад буцаагаад улмаар Б.Хурц нарыг батлан даалтад гаргачихсан. Энэ мэт ёс зүйгүй байдлыг таслан зогсоохын тулд Шүүхийн тухай хуульдаа өөрчлөлт оруулж, Шүүхийн ерөнхий зөвлөлийн чиг үүргийг тодорхой зааж өгмөөр байна” гэлээ.

У.Тэргэл