Өчигдөр буюу наймдугаар сарын 25-ны өдөр “Мандала турс” аяллын компаниар БНХАУ руу явсан 28 аялагч тус компанид залилуулж, Хөххотын зочид буудалд буудлын төлбөр төлөөгүй гэдэг шалтгаанаар цагдаад шалгагдсан талаар бид мэдээлсэн. Тэгвэл тус компанийн талаар БНХАУ-ын "VV Travel" компанийн Монгол менежер Б.Уянга бидэнтэй холбогдож, дараах мэдээллийг өглөө.  

Тэрбээр "Би гурван жилийн өмнө "Мандала Турс" компанитай хамтарч ажилладаг байсан. Тухайн үед 3-4 удаагийн аяллын мөнгийг шилжүүлээгүй. Аяллын төлөвлөсөн хугацаа нь болчихсон учир бид хүмүүсээ аялуулсан. Гэсэн ч тэдгээр хүмүүсийн мөнгийг "Мандала Турс" компани одоо хүртэл шилжүүлээгүй. Гурван жил өнгөрсөн байна. Би тус компанитай одоо ч холбоотой байгаа. Холбогдоод мөнгөө нэхэхээр зүй бус үг хэлж, бүдүүлэг харьцдаг. 

"Мандала Турс" компани бол маш удаж байгаа компани. Монголчууд Манжуур руу хамгийн их аяладаг байсан үед л үйл ажиллагаагаа явуулдаг байсан. Тус компанийн эзэн н.Хосбаярыг Манжуурын хүмүүс луйварчин гэдгээр нь андахгүй танина. Компанийн нэрээ өөрчлөөд л үйл ажиллагаагаа явуулсаар байдаг. Хэсэг хэвийн үйл ажиллагаагаа явуулна, тэгж байгаад буцаад л хулхиддаг. 

Хоёр хоногийн өмнө эрээний хил дээр "Мандала Турс" компаниар аялах гэж байгаа гэх долоон хүнтэй уулзсан. Тэд ч ялгаагүй хулхидуулчихсан. Хил дээрээс дахин өөрсдөө мөнгөө гаргаж аялахаар явсан. Монголдоо очоод хуулийн байгуулагад хандана гэсэн. Өчигдөр дахиад л 28 хүн хулхидуулж хоцорсон байна. 

Би энэ компанид хулхидуулсан гэх олон хүнтэй холбогдсон. Тэд Монголдоо очоод учрыг нь олно гэдэг ч бүгд л чимээгүй болчихдог. Магадгүй ганц ганцаараа хүчгүйддэг байх. Би ч ялгаагүй.

Хууль, цагдаагийн байгууллагад хандахад нэг их тоодоггүй. Иймд олуулаа хуулийн байгууллагад хандаж, хамтдаа энэ компанитай тэмцэх хэрэгтэй байгаа юм" гэлээ. 

Д.Батчулуун