"Ариг" банкийг хамтран эзэмшдэг байсан "Эрэл"-ийн Б.Эрдэнэбат, Номин"-гийн Ш.Баярсайхан нар муудалцаад хэдэн жил болсон. Улмаар Иргэний шүүх, Эрүүгийн хэргийн шүүхээр заргалдаж, Б.Эрдэнэбат нь бусдыг залилсан, мөнгө угаасан гэх хэргээр анхан шатны шүүхээс хорих ял хүртэл авсан. Харин давж заалдах шатны шүүх 2020 оны 12 сарын 15-нд Б.Эрдэнэбатад ял оноосон анхан шатны шүүхийн шийдвэрийг хүчингүй болгосон. Хэргийг прокурорт буцаасан.

Тэрбээр шүүх хурлын дараа 100 сая төгрөгийн барьцаа тавьж батлан даалтад гарчээ. Б.Эрдэнэбат ийн суллагдсаныхаа дараа "Хууль бус гүйцэтгэх ажиллагааны улмаас "Ариг" банкаа дээрэмдүүлсэн" гэх гомдлыг ТЕГ-т гаргасан байна. Үүндээ улс төр, хууль хяналтын нэр бүхий хүмүүсийг буруутгасан гэх эх сурвалжийн мэдээлэл байна. Тухайлбал, түүнийг эрүүгийн хэрэгт холбогдуулж, банкийг нь дээрэмдэх хууль бус үйл ажиллагаанд Ш.Баярсайхантай ҮАБ-ын нарийн бичгийн дарга А.Гансүхийн итгэлтэй хүн болох өмгөөлөгч Б.Баасанцогттой тохиролцож шүүх, прокурор дээр эсрэг талаас ирсэн гомдол нэхэмжлэл зэргийг өөрсдийн талд шийдүүлэх шийдвэрт нөлөөлөх ажлыг хийсэн.

ГТГ-ын дарга асан Г. Өлзийбүрэн /УИХ-ын дэд дарга С.Одонтуяагийн нөхөр/ хэрэгцээтэй санхүүжилтийг Ш.Баярсайханаас авч өгдөг. Мөн уг үйл ажиллагаанд УДШ-ийн ерөнхий шүүгч асан С.Батдэлгэр, Нийслэлийн прокурорын орлогч Ц.Насанбат нар холбоотой байж болзошгүй ажээ.