Тэтгэвэр өвлөгддөг болно. Энэ таатай мэдээг Хөдөлмөр нийгмийн хамгааллын сайд А.Ариунзаяа өөрийн цахим хуудаснаа мэдээлж, нийгмийн даатгалын, тэр дундаа тэтгэврийн тогтолцооны шинэтгэлийн талаар товчхон мэдээлэл өгчээ. Тэрбээр "Төрөөс тэтгэврийн шинэчлэлийн талаар баримтлах бодлого батлах тухай хуулийг 2015 онд баталсан байдаг. Түүний дагуу Монгол Улс олон давхаргат тогтолцоонд  шилжинэ. Хаврын УИХ-ын чуулганаар багц хууль батлуулахаар ажиллаж байгаа бөгөөд эхний ээлжид дөрвөн хуулийн үзэл баримтлал боловсруулж, дууслаа. Одоо нэг хууль үлдсэн.

Процессын хувьд тодорхой шат дараалалтай явдаг.

-Тэтгэврийн шимтгэлийн хувьд яг одоо ажил олгогч, ажилтан тус бүр 8.5 хувийг долоодугаар сарын 1-ныг хүртэл төлнө. 2017 онд ОУВС-гийн хөтөлбөрт нэгдэхдээ тэтгэврийн шимтгэлийг  2020 онд ажилтан, ажил олгогч нийлээд 19 хувьд хүргэх болсон нь 2007 оны түвшинд буцаан авчирсан хэрэг. Цар тахлын үед Засгийн газрын зүгээс 2020 оны дөрөвдүгээр сараас эхлэн хөнгөлөлт, чөлөөлөлтийн бодлого хэрэгжүүлж ирсэн. Цаашид нөхцөл байдал дээрдэхгүй бол энэхүү бодлогоо мэдээж үргэлжлүүлнэ. Бидний хувьд харин Тогтолцооны шинэтгэлд анхаарлаа илүүтэй хандуулан ажиллаж байна" гэжээ. 

У.Тэргэл