Хоёрхон хоногийн дараагаас улс даяар бүх нийтийн бэлэн байдлын зэрэгт шилжиж, хатуу хөл хорионы дэглэм үйлчилнэ. Гэвч өнөөдрийг хүртэл олон зүйл тодорхойгүй, бүрхэг, түүхий байна. Иргэдийг золговол 500 мянгаар торгоно, хөл хорионы дэглэм зөрчвөл 100 мянгаар торгоно гэж Зөрчлийн тухай хуулиар далайлгахаас өөрөөр ямар тодорхой шийдвэр, шийдэл гаргав. УОК өдийд авч хэрэгжүүлэх арга хэмжээгээ нарийн төлөвлөлт, схем, тооцоо судалгаатайгаар ард иргэдэд хэдийнэ танилцуулчихсан байх ёстой. Гэтэл шөнө дөл болтол хуралдаад байна хэмээн зураг хөргөө тавьж шоудахаас өөрөөр тоймтой зүйл алга.

Өнгөрсөн хугацаанд хатуу хөл хориог  хэдэнтээ тогтоогоод үр дүн гараагүй. Одоо л хумихгүй, хөл хорихгүй бол Цагаан сар гэхэд халдварын тохиолдол 2000 давна хэмээн УОК-ын өмнөх удирдлагууд мэдэгдэж, иргэд ч дуулгавартай хүлээн зөвшөөрсөн. Харин өнөөдөр нөхцөл байдал өмнөхөөсөө дордсон.

Харамсалтай нь, УОК-ын дарга, Шадар сайд С.Амарсайхан энэ бүхнийг давтчих гээд байна. Хажуу хавирганыхаа үгийг сонсохгүй, зөвлөгөө, саналыг авахгүй, хамтран ажиллахгүй, бусдын хэлсэн, ярьсныг үгүйсгэж буйд эргэн тойрныхон нь аргаа бараад байна. Сүүлийн нэг жишээ бол, хатуу хөл хорионы хугацаанд хүнсний дэлгүүрүүд, супермаркетуудаа хоёрдугаар сарын 11-16-ны хооронд долоо хоног ажиллуулахгүй байж, халдварыг нэг мөр хумьж авъя гэсэн Нийслэлийн онцгой комиссоос гаргасан саналыг эрс эсэргүүцэн “Үгүй, ажиллуулна” гэж гөжүүдлэх.

Эрүүл мэндийн сайд С.Энхболд богино хугацаанд 420 гаруй мянган өрхийн нэг гишүүнд  шинжилгээ хийх боломж, чадамж одоогоор байхгүй хэмээн үнэнийг өчсөнийхөө төлөө тархиа эргэтэл загнуулсан гэх.

Ямартай ч, Шадар сайдын эцэслэж чадахгүй байгаа шийдвэрүүд, багаараа ажиллаж чадахгүй байгаа гөжүүдэл нийгэмд эргэлзээ, бухимдлыг төрүүлээд байна. Хүнсний дэлгүүрүүд ажиллах уу. Ажиллавал ямар цагийн хуваариар вэ. Бараа бүтээгдэхүүнийг хэрхэн хүргэх вэ,  Эмийн сангууд, харьяа эмнэлгүүд ажиллах уу. Өрх бүрээс авах шинжилгээг очиж өгөх үү, эсвэл гэрт нь ирж авах юм уу. Дуудахыг нь хүлээх үү. Яг яах юм бол оо.  Шадар сайд аа!

У.Тэргэл