Хөдөлмөрийн үндэсний нам мэдээлэл хийж, Засгийн газарт шаардлага хүргүүлж байгаагаа мэдэгдлээ.

Намын Ерөнхий нарийн бичгийн дарга П.Ганзориг  вакцинжуулалт эрчимтэй хийсэн ч халдварын тархалт нэмэгдэж байгаа энэ үед иргэдийг нэг дор цуглуулах нь эрсдэлтэй. Тиймээс Засгийн газарт доорх шаардлагыг хүргүүлж байна гэлээ. Үүнд, Үндэсний их баяр наадмыг тэмдэглэх хугацааг хойшлуулах. Баяр наадам тэмдэглэхэд төсөвлөсөн 10 тэрбум төгрөгөөр Файзер вакцин худалдан авч, 12-оос дээш насны хүүхдүүдээ вакцинжуулах. Мөн төсвийн тодотголыг нэн яаралтай хийж, хөрөнгө оруулалтын төслүүдийг хойшлуулах, заримыг нь цуцлах. Хүүхдийн мөнгийг шат дараалан бууруулах. Орлого багатай айл өрхүүдэд түлхүү анхаарахыг шаардаж байна гэжээ.

ХҮН-ын дарга, УИХ-ын гишүүн Т.Доржханд “Мутацлагдсан Энэтхэгийн хэлбэр Монголд орж ирсэн байх магадлал 95 хувьтай байна. Тиймээс баяр наадмаа хийх цаг нь биш. Тохиолдлын тоо буурсан үед хийж болно. Иргэдээ хөдөө орон нутагт аялах боломжоор хангах хэрэгтэй. 150 сая орчим ам.долларыг гадагшаа аялахад зарцуулсан. Энэ мөнгийг дотоодын жуулчдадаа зарцуулах хэрэгтэй. Аялал, жуулчлалаас оруулах орлогын 73 хувийг дотоодынхоос бүрдүүлдэг гэсэн олон улсын судалгаа байдаг. Тиймээс бөөгнөрөл үүсгэхгүйгээр гэр бүлээрээ хөдөө орон нутагт аялах боломжоор хангах ёстой.

Хаврын чуулгандаа багтаагаад төсөвт тодотгол хийх хэрэгтэй байна. Долоодугаар сарын 1-нээс иргэд, аж ахуйн нэгжийн амьдрал бидэнд хамаагүй гэж хандаж болохгүй. Ковидын үед олон хүүхэдтэй айлуудад хүнд тусч байна. Ковидын үед хамгийн нүдээ олсон хөтөлбөр бол хүүхдийн мөнгө юм. Тиймээс шууд 20 мянга болгон бууруулж болохгүй. Хөгжлийн бэрхшээлтэй иргэдэд олгож буй мөнгийг бууруулж болохгүй. Хүндрэл цааш үргэлжлэх тул эрдэмтдийн зөвлөгөө, шинжлэх ухаанд суурилсан шийдвэрийг Засгийн газар гаргах хэрэгтэй байна” гэлээ.