Коронавирусний халдварын эмчилгээний Арбидол эмийг хэд дахин нугалж зарж байгаа талаарх шүүмжлэл нийгэмд өрнөөд байгаа. УИХ-ын гишүүн Ж.Сүхбаатар Арбидол эмийн суурь үнэ 6000 төгрөг байсныг цар тахал идэвхжихийн хэрээр эмийн компаниуд үнийг таваас, зургаа дахин нэмж, өдгөө 30-38 мянган төгрөгөөр зарж байгааг чуулганы танхимд мэдэгдсэн. Тиймдээ ч Шударга өрсөлдөөн хэрэглэгчдийн төлөө газраас эмийн сангуудад хяналт шалгалт хийж эхэлсэн билээ.

Харин эм борлуулалтын салбартаа монопол “Монос орхон фарм” ХХК нь цар тахлын энэ үед үйлчлүүлэгчдээ бодон нэн хэрэгцээт Арбидол эмийнхээ үнийг бууруулсан талаараа ШӨХТГ-т мэдэгджээ.

Үнэхээр л үндэсний томоохон компаниуд энэ цагт л чанараа таниулдаг учиртай. Тэгвэл “Монос орхон фарм” ХХК нь 2021 оны зургаадугаар сарын 16-ны 51 тоот Шударга өрсөлдөөн, хэрэглэгчдийн төлөө газарт хэмээн хаягласан албан бичигтээ ийн дурджээ.

“Монос орхон фарм” ХХК нь 2021 оны зургаадугаар сарын 16-ны өдрөөс коронвирусний халдварын эмчилгээний Арбидол 100 мг №20 эмийн бөөний үнийг 31500 төгрөгөөс 30000 төгрөг,  жижиглэн үнийг 38800 төгрөгөөс 36000 төгрөг болгож, хямдруулсан болно. Захирал Ю.Нарантуяа гэжээ.

Үнэхээр их талархах учиртай юү. Дээр дурдсанчлан, үндэсний монопол компани байж цар тахлаар өдөрт арваас илүү хүн амиа алдаж, өвчлөл 2000 гараад байхад халдварын эмчилгээний гол эмийнхээ үнийг 1500-2800 төгрөгөөр хямдруулснаа  эх оронч үйлдэл хэмээн эндүүрч, энэ тухайгаа албажуулан мэдэгдэж суугаа нь өрөвдмөөр.

Өмнө нь “Монос-ынхон Астразензека вакцин оруулж ирж, нийгмийн үүргээ биелүүлнэ хэмээн сүржигнэж, удалгүй төр, засаг вакцинуудыг нь оруулж ирэхгүй хил дээр гацааж байгаа талаар гомдоллож, эцэстээ зөвшөөрөлүй вакцин оруулж ирсэн нь тодорхой болж, ард иргэдийг молигдож дөнгөсөн. Үеийн үед байнгын хэл ам дагуулж ирсэн “Монос”-ынхны үнэн төрх энэ удаад ч цухалзаж, шуналаа барьж дийлсэнгүй.

Аливаа байгууллага, аж ахуйн нэгж ашгийн төлөө явах нь зүйн хэрэг. Гэвч улс нийгмээрээ цар тахлын хүнд үеийг даван туулах гэж хичээж байгаа энэ цагт ялангуяа бусдын эрүүл мэнд, амь настай холбоотой асуудалд бүхнийг зоосны нүхээр харах нь хэр зохимжтой вэ, “Монос”-ыхоон!

У.Тэргэл