УИХ-ын чуулганы хуралдаанаар Монгол Улсын хөгжлийн 2022 оны төлөвлөгөө батлах тухай” Улсын Их Хурлын тогтоолын төслийг хэлэлцэж байна.

С.Одонтуяа: Манай улсад байга албан бичиг баримт, төлөвлөгөө, зорилгоороо бол аль хэдийн хөгжлөөрөө тэргүүлэхээр байгаа. Нэгдүгээр асуудал, Сүүлийн 30 жилд Монгол Улсын ядуурал 26-30 хувьтай хэвээр байна. Хөгжлийн төлөвлөгөөний дагуу хэзээ ядууралгүй болох вэ. 2022 оны төгсгөлд ядуурал хэдэн хувиар буурах вэ. Улс орнууд өрсөлдөх давуу тал дээрээ тулгуурлаад тэргүүлэх чиглэлүүдээ тодорхойлж байгаа. Манай улсын хувьд юу хийх, юу хийхгүй байхыг хэлж өгөөч. Үл дэмжих, хязгаарлах ямар салбар байна вэ.

Манай улсад Эдийн засгийн хөгжлийн яам байхдаа манай улсын хөгжлийг гацаагаад байгаа зүйл юу байна гэдэгт анхаараад барилгын материал, хүнсний үйлдвэрүүдэд маш их дэмжлэг үзүүлж байсан.

Бүх аймгуудыг авто замаар холбох нь аялал жуулчлал, ачаа эргэлтэд чухал нөлөөтэй. Улаанбаатар хотод түгжрэл үүсгээд байгаа гол зүйл нь уулзвар гээд 15 уулзаврыг сольж байсан. Тиймээс хөгжлийг гацаагаад байгаа зүйлүүд дээрээ онцгой анхаарах ёстой. Түүнээс биш бүх зүйл рүү үсчээд явахгүй.

ЗГХЭГ-ын дарга Ц.Нямдорж: Улс төрийн нөлөөллийн тухайд улстөрчдийн ухаанаас л шалтгаална. Их Хурал, Ерөнхийлөгч, Засгийн газар хэр зөв байж, тэвчиж болох зүйлээ хэр тэвчиж болох зэрэг ухаанаас л шалтгаална. Ухаан суулгахад хэцүү дээ. Өөрсдөө хатуурхах зүйл дээрээ хатуурхаж, зөөлрөх үедээ зөөлөрч, ойлголцож ажиллаж чадвал улс төрийн нөлөөллийг багасгаж чадна.

Ерөнхий сайд томилогдохдоо Эдийн засгийн хөгжлийн яам, Цахим яам байгуулна гэж хэлсэн. Намрын чуулганаар хэлэлцүүлэх төлөвлөгөөтэй байгаа. Энэ үеэр шинээр байгуулагдах хоёр яамны асуудал шийдэгдэх байх.

ХНХ-ын сайд А.Ариунзаяа: Ажилгүйдэл, ядуурлын хувьд суурь тоон үзүүлэлтийг оруулж ирэх ёстой. Ядуурлыг 2030 он гэхэд тэглэнэ гэдэг зорилтыг дэлхийн бүх улсууд дэвшүүлсэн. Үүнтэй нэгэн адил манай улс ч нэгдээд аль болох тэглэх рүү чиглэсэн үйл ажиллагаа явуулна. Бидний хувьд ядуурлыг бууруулахад эрүүл мэнд болон боловсролын салбар руу түлхүү анхаарч, бодлого явуулах ёстой.

Манай яам хөдөлмөр эрхлэлтийг илүү дэмжих чиглэлийг барьж ажиллаж байгаа.

Өнөөдөр хэн халамж хүлээж авч байна, тэдгээрийг хэрхэн хөдөлмөр эрхлэлтэд бэлтгэ, ур чадвар суулгах вэ гэдэг зорилгууд нэгдсэн журмаар орж ирж байна.

Өнөөдөр зах зээлийнхээ эрэлтэд нийцсэн боловсон хүчнийг бэлтгэхийн тулд боловсролын цогц бодлогыг дэвшүүлж ажиллах ёстой.

ЗГХЭГ-ын дарга Ц.Нямдорж: Ажилгүйдлийн талаар ярих төвөгтэй байна. Хамаг юмнууд зогсоод, хил хаалттай байсан. Өнөөдрийн байдлаар 67 мянган ажлын байр байхгүй болсон гэсэн судалгаа гарсан. Энэ Засгийн газар гарч ирээд 10 их наядын хөтөлбөрийг хэрэгжүүлсэн. Долоо хоног бүр хөтөлбөрийн хэрэгжилтийн үр дүнг хэлэлцэж байгаа. Ерөнхий санаа нь үйлдвэр, ААН-ийн үйл ажиллагааг амилуулж, үүнийг дагасан ажилгүйдлийг бууруулах тооцоотой хийгдэж байгаа ажил. Энэ жилийн тухайд 20 мянган ажлын байр бий болгох тооцоотой ажиллаж байна. Гэхдээ байдал амаргүй байгаа.

Б.Лхам