Номын баярын үеэр цагдаа нарт зодуулсан гэх зохиолч С.Төмөр болсон явдлын талаар мэдээлэл хийлээ. 

Тэрбээр "Номын баяраар Төв талбайд асар авахыг, оролцохыг хүссэн боловч зай талбай үлдээгүй гэсэн. Нэг асрын үнэ 400 мянган төгрөг байдаг юм билээ. Ингээд номын баяр эхлэхэд би очсон. Зарим хүн номоо ил худалдаж байсан учраас би зарчих санаатай гурван номоо авч очсон юм. Гэтэл энэ сарын 13-ны өдөр цагдаа нар надад хүч хэрэглэснийг зарим иргэн бичлэг хийн, баримтжуулсан байна билээ.  

Хоосон саравч, сандал байхаар нь би очиж номоо дэлгээд байтал 18.00 цагийн үед хоёр залуу ирээд, та энд номоо зарж болохгүй, түрээсийн мөнгө төлөөрэй гэхээр нь би хэдхэн минут л сууя гэхэд үгүй гэсэн. Би үгэнд нь орж гарсан.

Сайн дураараа номоо зарж байгаа хүмүүсийн хажууд очтол өнөө хоёр охин Сүхбаатар дүүргийн хоёр цагдаатай ирсэн. Энэ хоёр охин ямар нэг таних тэмдэг бүхий хувцас өмсөөгүй байсан учраас ямар байгууллагаас ирснийг би мэдэхгүй.

Мөн тухайн өдөр намайг согтуу байсан гэж зарим хүн бичсэн байсан. Би архи, тамхи огт хэрэглэдэггүй хүн. 

Цагдаа нар намайг авч явна гэсэн. Би нийтийн хэв журам зөрчөөгүй учраас татгалзтал хоёр цагдаа намайг босгоод, толгой, хавирга руу цохисон. Бөхийн мэхээр газар унагаад нэг цагдаа нь над дээр өвдөглөж суусан. Одоо ч миний бие хөндүүр байна. Тэд эхнэрийг маань ч цохисон. Би зүгээр явах гэтэл явуулаагүй. Би 58 настай. Над дээр ирсэн хоёр цагдаа 25 орчим насны залуус  болов уу. Би гомдол гаргасан. Шүүх эмнэлэгт үзүүлэн, бичиг авсан. Биднийг харсан хүмүүс тойрч зогсоод, бичлэг хийж эхэлсэн юм. Зарим нь намайг өмөөрч, нэг цагдааг татаж, болиоч ээ, хөгшин хүн зодохоо боль гэж шаардлага тавьсны дараа цагдаа нар зугтаачихсан" гэлээ. 

А.Сүх