Коронавирусний цар тахлын үед авч хэрэгжүүлж буй арга хэмжээг идэвхжүүлж, чангатгах үүрэг, чиглэлийг Ерөнхий сайд холбогдох албаныханд өгсөн. Энэ дагуу өчигдрөөс бүхий л албан байгууллага, аж ахуйн нэгж, цаашлаад том, жижиг гэлтгүй хүнс, барааны дэлгүүрүүдийн хяналт чангарчээ.

Тодруулбал, вакцины бүрэн тунгаа хийлгэсэн иргэдэд л үйлчлэхээр болж, энэ талаарх мэдээллээ цаасаар эсвэл утсан дээрээ зургаар авч явахыг шаардаж байна. Энэ бүхнийг нягталж байж, дотогш нэвтрүүлж буй юм.

Өмнө нь вакцинаа хийлгээгүй, нэг, хоёр дахь тунгаа хийлгэсэн ялгаагүй чөлөөтэй хаа сайгүй зорчиж, үйлчлүүлж байсан. Харин өдгөө вакцины бүрэн тундаа хамрагдсан иргэд банк, дэлгүүр, худалдааны төв, албан байгууллага, эмийн сан, эмнэлэг, төрийн байгууллагаар чөлөөтэй үйлчлүүлж, харин бусдыг нь ийм аргаар “чангалж” эхэлж байна. Хаа газраар үйлчлүүлсэн ч ийм журам үйлчлэхээр болсон байна. Энэ нь зарим нэгний дургүйцлийг төрүүлж, худалдааны Баянзүрх зах гэхэд л үүдэндээ бөөн бужигнаан, хэрүүл байв. Ялгаварлалаа, хүний эрхийг зөрчлөө гэж бухимдсан хэсэг байхад зөв, зүйтэй. Хэдийнэ л ингэх байсан юм гэх иргэд ч байв. Харин Сансарын Е Март дэлгүүрээр үйлчлүүлэх иргэдэд ийм шаардлага тавихад дийлэнх нь ухамсартайгаар биелүүлж байв.

Хамгийн гол нь вакциндаа хамрагдаагүй болон эхний тунгаа л хийлгэсэн иргэд олноороо халдвар авч буй. Тиймээс тэднийг эрсдэлээс сэргийлэх, нөгөөтэйгүүр, сүргийн дархлаа тогтоохын тулд хожимдсон ч гэлээ ийм арга хэмжээ авсан нь нүдээ олжээ.

У.Тэргэл