УИХ-ын чуулганы өнөөдрийн нэгдсэн хуралдаанаар хэлэлцэх эхний асуудал болох Соёлын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийж байна. Энэ үеэр гишүүд байр сууриа илэрхийлж, Соёлын яамны холбогдох албан тушаалтнууд хариулт өглөө.

УИХ-ын гишүүн Ж.Батсуурь: Соёлын тухай хуулийн төсөлд соёлын өвийг хадгалж хамгаалахад зарцуулах төсөв санхүүжилтийг хэрхэн шийдвэрлэх асуудлыг тусгасан уу. Энэ талын зохицуулалтгүй бол лоозонгийн шинжтэй хууль болно шүү.

Соёлын дэд сайд Батбаяр: Хүүхэд залуучууд даяаршлын нөлөөнд автаж, үндэсний онцлогтоо төдийлөн ач холбогдол өгөхгүй байх тал бий. Иймд энэ хуулийн төсөлд Соёлын өвийг төрийн онцгой анхааралд байлгах, соёлын дархлаа бүхий монгол хүнийг төлөвшүүлэх зохицуулалт бүхий заалтуудыг тусгасан. 

УИХ-ын гишүүн Б.Бат-Эрдэнэ: Энэ бол маш чухал хууль. Монгол бөхөөс эхлээд морь, сур маань ад үзэгдэх талдаа ороод байна. Үүнд, соёлын өвийг тээгчдийн ёс зүйтэй холбоотой асуудал ч бий. Үндэсний онцлогтой уламжлалт зан заншлаа хадгалах, сурталчлах талаар төсөлд ямар заалтууд тусгасан бэ?

Соёлын сайд Ч.Номин: Нүүдлийн соёл иргэншлийг түгээн дэлгэрүүлж, танин мэдүүлэх үүрэгтэй хууль. Энэ хүрээнд төрөөс тусгайлан дэмжлэг үзүүлэх салбаруудыг хуулийн төсөлд тусгасан байгаа гэв.

У.Тэргэл