“УБЦТС” ТӨХК-ийн үйл ажиллагаанд дэмжлэг үзүүлэх зорилгоор 2021 онд түгээх сүлжээний алдагдал өндөр фидерүүдийн зарим 0,4 кВт-ын цахилгаан дамжуулах агаарын шугам, шитүүдийг засварлах, тоолуур хэмжих хэрэгслийг шинэчилж, ухаалаг  болгох ажлыг хийж, эхлүүлэхээр болсон.

Энэ хүрээнд Сонгинохайрхан дүүргийн “УБЦТС” ТӨХК-ийн харьяа Хэрэглэгчдэд үйлчлэх төвд хамаарах гэр хорооллын өрхүүдээс уг шинэчлэлийг эхлүүлэхээр боллоо. Ингэснээр Тоолуур, хэмжих хэрэгслийн хувьд бүрэн шинэчилж, сүүлийн үеийн ухаалаг тоолуур тавина. Энэ нь Улаанбаатар хотод хийж, хэрэгжүүлж буй анхны ухаалаг шугам сүлжээ бөгөөд техник технологийн дэвшил бий болж, эрчим хүчний зүй бус хэрэглээ буурах юм. Мөн компанийн орлого нэмэгдэж, эрчим хүчний системд төвлөрүүлэх мөнгөн дүн нэмэгдэх, хэрэглэгчдэд үзүүлэх үйлчилгээний хүндрэлүүд эрс буурахаас гадна бүхий л төрлийн үйлчилгээг цахимаар авах боломжийг нээх давуу талтай аж.

Уг шинэчлэлд эхний байдлаар тус дүүргийн гэр хорооллын 10 мянган хэрэглэгчийг хамруулахаар төлөвлөжээ.

Эрчим хүчний сайд Н.Тавинбэх “Улаанбаатар хотын цахилгаан хангамжийн хувьд тулгамдсан олон асуудал бий. Тухайлбал, өсөн нэмэгдэж байгаа хэрэгцээг хангах үүднээс шинэ эх үүсвэр барих, одоо байгаа эх үүсвэрүүдийнхээ хүчин чадлыг нэмэгдүүлэх зайлшгүй шаардлагатай. Учир нь, өнөөдрийн дулаан хангамж үйлдвэрлэдэг хүчин чадал хэрэглээнээсээ дутсан байдалтай явж байна. Уг нь олон улсын жишгээр 20 хувийн нөөцтэй байх ёстой. Ямар нэгэн эрсдэл гарсан үед үүнийгээ ашигладаг юм.

Цахилгаан хангамжийн хувьд харьцангуй тэнцвэрээ барьж байгаа. Гэхдээ тун удахгүй давж магадгүй байна.

Хоёрдугаарт, өнгөрсөн хугацаанд үйлчилгээнийхээ соёлд дутуу анхаарсан байна. Энэ цаг үед ухаалаг систем рүү шилжих ёстой. Ийм системийг Улаанбаатар хотод яаралтай эхлүүлэх шаардлагатай байна. Ухаалаг болгоход тодорхой хэмжээний хөрөнгө санхүү шаардлагатай.

Улаанбаатар хотыг эрчим хүчний ухаалаг систем рүү шилжүүлэхэд ойролцоогоор 120 сая орчим ам.доллар шаардлагатай гэсэн тооцоо гарсан.

Энэ мөнгийг нэг дор гаргах боломжгүй учраас хүн ам олонтой, хүндрэлтэй байгаа цэгүүд дээрээ эхлүүлье гэж зориод Сонгинохайрхан дүүрэгт эхний байдлаар нэвтрүүлэхээр ажиллаж байна” гэлээ.

Ташрамд дурдахад, Сонгинохайрхан дүүргийн 10 мянган хэрэглэгчийг ухаалаг технологид суурилсан эрчим хүчний системд нэвтрүүлэхэд гурван тэрбум төгрөг шаардлагатай гэсэн урьдчилсан тооцоо гарчээ.

А.Сүх