Дотоодын халдвар 100 мянга давж, өдөрт бүртгэгдэх халдварын тоо 2000-аас буурахгүй байгаагаас гадна нас баралт 500 шүргэж, нөхцөл байдал хүнд байна. Эрүүл мэндийн салбарынхан ч туйлдаж байгаагаа хэлсээр буй. Гэхдээ хорьвол удаан хугацаанд хорионд байсан ААН, иргэд орлогогүй болж “элгээрээ хэвтэх” эрсдэлтэй. Хорихгүй сул тавъя гэхээр “гамшиг” болчих гээд байдаг. Ийм л цаг үе иржээ.

Улмаар энэ бүхэн юунаас эхлэв, хаана буруудав гэдэг асуултад хариулт эрж байна.

Зарим гишүүдийн зүгээс анхнаасаа юу ч болоогүй байхад хөл хорьж, сүржигнэснээс өнөөдрийн хүндрэлүүд бий болж байна гэх. Зарим нь өдийгөөс төдийг хүртэл ямар ч менежментгүй ажилласных хэмээн дүгнэж, өөрсдийн байр сууриа илэрхийлсээр байна.

Дотоодод халдвар анх бүртгэгдсэн өнгөрөгч оны арваннэгдүгээр сарын 10-ны өдрөөс хөл хорио тогтоож эхэлсэн. Үүнээс хойш хэд хэдэн удаа хөл хорьж улмаар  ААН-үүд нь “мод”оо барихад хүрч, ажилгүйдлийн тоо улам бүр ихсэв. Өнөөдөр иргэд урд хормойгоороо хойд хормойгоо нөхөж, хүндхэн л амь зууж байна.

Халдварын тоо 2000 мянга давж, нас баралт хоёр оронтой тооноос буурахгүй байгаа энэ үед л хорьсон бол гэж халаглаж суух хүн олон.  

Хамгийн сүүлд сар шахам хугацаанд хорьсон хөл хорионыхоо үр дүнг сонгуулиар сольж, улсаа тэр чигээр нь улаан бүс болгочихсон. Нөхцөл байдал хүндрэн иргэд уй гашууд автаж, туйлдаж байхад наадам хийнэ. Гэсэн мөртлөө төгсөх ангийн сурагчдын элсэлтийн ерөнхий шалгалтыг зохион явуулахад халдвар тарчих гээд болдоггүй. Явж явж улс төрийн үйл явдал болохоор бүх зүйл нээлттэй. Тэдэнд халдвар хэрхэн тархаж “гамшиг” болох нь ямар ч "падлийгүй" аж. 

А.Сүх