Ардын хувьсгалын түүхт 100 жилийн ой тохиож байгаатай холбоотойгоор Өршөөлийн хууль гарах болов уу гэсэн хүлээлт нийгэмд үүсээд байгаа юм. Харин Хууль зүйн сайд Х.Нямбаатар, ЗГХЭГ-ын дарга Ц.Нямдорж нар үүнийг үгүйсгэсэнгүй.
Тодруулбал, Ц.Нямдорж сайд” Тийм төсөл боловсруулж байгаа. Өршөөлийн ажиллагаа гэдэг их амаргүй. 6000-7000 мянган хоригдлын дунд өршөөлд хэнийг хамруулах вэ гэдгийг ярьдаг. Хуучин бол 1200 орчим хүнийг байнга сулладаг байсан. Тухайлбал, анх удаа хөнгөн гэмт хэрэг үйлдсэн, хорихоос өөр төрлийн ялтай гэх мэт. Энэ ажлыг зохион байгуулахад хөрөнгө хүч их зардаг. Ерөнхийдөө Ардын хувьсгалын 100 жилийн ойгоор ийм хууль гарах юм байна гэсэн хүлээлт олон нийтэд ч, ял эдэлж байгаа хүмүүсийн дунд ч бий. Тэгэхээр ямар нэгэн хэмжээнд шийдвэрлэж, гарч таарна.
-Энэ удаагийнх өмнөх Өршөөлийн тухай хуулиудаас юугаараа ялгаатай, онцлог байх бол?
-Би 1984 оноос хойшх Өршөөлийн хуульд оролцсон хүн. Хуучныхаас нэг ялгаатай нь шинэ 2015 оны Х.Тэмүүжингийн батлуулсан хуулиар Өршөөлийн хууль явах юм. Ял эдэлж байгаа хүмүүсийн дотор шинэ, хуучин хуулиар шийтгүүлсэн хүмүүс байгаа. Энэ хоёр хуулийн хооронд бас асуудал үүснэ. Энэ бүхнийг зөв гаргах шаардлагатай болно.
-Өршөөлийн хуулийг Үндэсний их баяр наадмаар гаргана гэж ойлгож болох уу?
-Шийдвэр нь яг хэзээ гарахыг нарийн хэлж мэдэхгүй байна. Баримжаа хугацаа нь бол тийм.
-Ямар хүмүүсийг Өршөөлийн хуульд хамруулдаггүй вэ?
-Авлига албан тушаалын болоод хүн амины хүнд гэмт хэрэг үйлдсэн, их хэмжээний ялтай хүмүүс хамрагдахгүй. Гэхдээ яг төсөл нь орж ирээгүй болохоор одоо хэлж мэдэхгүй байна.
У.Тэргэл
