Нийслэлийн Соёл урлагийн газрын даргаар ажиллаж байсан, Quiza нэрээр олонд танигдсан дуучин Б.Батцэнгэл сошиал орчинд идэвхтэй, олон дагагчтай нэгэн. МАН-ын олон сонгуулийн шторкийг хийж байсан кино найруулагч, жүжигчин Б.Амарсайханы зохиолын гол санааг бичдэг байсан гэдгээ нэгэнтээ дурдаж байсан тэрбээр өнөөдөр хатуухан үгийг өөрийн твиттэр хуудаснаа бичсэн нь олны анхаарлыг татаад байна.

Шинэ Ерөнхийлөгчийн тангараг өргөх ёслолын хүндэтгэлийн чуулган болон талбайн гадаа эсэргүүцлийн цуглаан хийх гэсэн иргэд, хөл хорионд сөхрөөд байгаа аж ахуйн нэгжүүдийн талаар хоёрхон өгүүлбэрээр санаагаа илэрхийлсэн ч түүнийг нь маш олон хүн дэмжиж байгаагаа илэрхийллээ.

Тэрбээр, “Нэг нь үнэргүй тамхиа ордонд татаж суухад, нөгөө нь үзэл санааны баривчилгаанд ачигдана...МАНдебо ба Монголхүүгийн ялгаа. Нэг нь хөлсөөр стори хийнэ, нөгөө нь хөлсөө дуслуулсныхаа төлөө дампуурна... Ангууч ба аж ахуйн нэгжүүдийн ялгаа” хэмээн твиттэр хуудастаа жиргэсэн юм.

Дашрамд сануулахад, Ерөнхийлөгчийн тангараг өргөх Хүндэтгэлийн чуулган болсон танхимд “Вандебо” хамтлагийн дуучин утаагүй тамхи татаж байгаа нь шууд нэвтрүүлгийн зураглаачийн дуранд буусан билээ. Харин энэ үеэр эсэргүүцлийн жагсаал хийж байсан залуусыг хуулийн байгууллагынхан баривчилсан юм. Мөн Ерөнхийлөгчийн сонгуулийн сурталчилгааны үеэр МАН-аас нэр дэвшигчийг дэмжиж байсан Ангууч буюу Б.Баттөр энэ ёслолд оролцсон бол хоёр жилийн хөл хорионд олон аж ахуйн нэгжүүд хаалгаа бариад байгааг тэрээр ийн харьцуулан сануулсан билээ.

С.Сүлд