Эрчим хүчний сайд Н.Тавинбэх Эрдэнэтийн дулааны цахилгаан станцын хүчин чадлыг 35 мегаваттаар өргөтгөх төсөл арга хэмжээний ажлын явцтай газар дээр нь очиж танилцаж,тулгамдсан асуудлыг шийдвэрлэлээ.

Тэрбээр энэ үеэр ““Монгол Улсын Засгийн газрын үйл ажиллагааны Мөрийн хөтөлбөрт тусгасан цахилгаан, дулаан эрчим хүчний өсөн нэмэгдэх хэрэгцээг хангах зорилгоор одоо ашиглаж байгаа дулаан цахилгааны эх үүсвэрүүдийн хүчин чадлыг нэмэгдүүлэх төслийн нэг нь Эрдэнэтийн дулааны цахилгаан станцыг хүчин чадлыг 35 мгвт-аар өргөтгөх юм. Өнөөдрийн байдлаар энэ ажлын гүйцэтгэл 96 хувьтай явна.  Бид 2021-2022 оны өвлийн их ачаалаас өмнө өргөтгөлийг ашиглалтад оруулж, сүлжээнд цахилгаан дулааны эрчим хүч нийлүүлэх учиртай. Эрчим хүчний сайдын хувьд газар дээр нь ирж, ажлын гүйцэтгэлтэй танилцаж, зарим нэг тулгамдсан асуудлыг шийдвэрлэлээ. Гүйцэтгэгч байгууллага энэ ажил наймдугаар сарын 20-нд ашиглалтад оруулна гэсэн мэдээллийг өгч байна. 

Ковидоос шалтгаалсан эдийн засгийн хүндрэлийг бууруулах зорилгоор Монгол Улсын Засгийн газраас өнгөрсөн оны арванхоёрдугаар сарын 1-нээс  энэ оны долоодугаар сарын 1 хүртэлх зарим аж ахуйн нэгж байгууллага, айл, өрхийн цахилгаан дулаан, уурын төлбөр, хог усны хураамжийг төрөөс хариуцан төлөхөөр болсон.

Ажлын байрыг тогтвортой хадгалах, өргөн хэрэглээний бараа бүтээгдэхүүний үнийн өсөлтийг хязгаарлах, айл өрх, аж ахуйн нэгжид санхүүгийн дэмжлэг болсон энэхүү арга хэмжээ үр дүнгээ өгсөн.

Засгийн газрын хуралдаанаар цахилгаан дулааны эрчим хүч, уурын төлбөр, хог усны хураамжийг Засгийн газраас даах асуудлыг энэ оны арванхоёрдугаар сарын 31-ны өдөр хүртэл үргэлжлүүлэхээр болсон.

Ковидоос шалтгаалсан эдийн засгийн хүндрэл хэвийн горимд орж чадахгүй байгаатай холбоотойгоор Засгийн газар дээрх шийдвэрийг гаргасан.

Харин энэхүү төлбөрийн санхүүжилтийг Уулын баяжуулах Эрдэнэт үйлдвэр гаргаж байгаа. Энэ нь нийгэм болоод эрчим хүчний салбарт ач тусаа өгсөн. Хэрэглэгчдийн төлбөрийн чадвар муудсантай холбоотойгоор бид цахилгаан дулаан, эрчим хүчний төлбөрийг барагдуулахад маш хүндрэлтэй нөхцөл байдал үүсээд байсан. Энэ хүндрэлтэй нөхцөл байдал цахилгаан дулаан, эрчим хүчний үйлдвэрлэгчдэд,  энэ салбарынханд үйл ажиллагаагаа хэвийн үргэлжлүүлэхэд санхүүгийн хувьд тулгамдсан асуудал болоод байсан юм. Харин энэ төлбөрийг төрөөс дааснаар асуудлыг шийдэж, хэвийн үйл ажиллагаагаа явуулах боломжоор хангасан юм. Энэ амаргүй цаг үед улс эх орондоо тэр дундаа манай салбарт хэрэгтэй арга хэмжээг санхүүжүүлж байгаад салбарын сайдын хувьд Эрдэнэт үйлдвэрийн хамт олонд талархаж буйгаа илэрхийлье. Ташрамд,  үндэсний үйлдвэрлэл гэдэг ямар их ач холбогдолтой болохыг энэхүү арга хэмжээнээс маш сайн ойлголоо” гэв.     

Р.Алтан