“Токио-2020” зуны олимпийн наадамд оролцох Монголын багийн хоёр дахь цуваа өнөөдөр Япон улсыг зорих байлаа. Энэ удаагийн баг бүрэлдэхүүнд Ерөнхий сайд Л.Оюун-Эрдэнэ болон Ерөнхийлөгч асан Х.Баттулга тэргүүтэй албаныхан, тамирчин, дасгалжуулагч нийлсэн 71 хүн багтжээ.
Тэдний суусан нисэх онгоц өнөө өглөө Хөшигийн хөндий дэх Чингис хаан олон улсын нисэх онгоцны буудлаас Монголын цагаар 11:00 цагт хөөрөх байсан боловч нислэг 8 минутаар хойшилсон байна.
Учрыг тодруулбал, жүдо бөхийн ДАШТ-ий хүрэл медальт, гавьяат тамирчин, гавьяат дасгалжуулагч Хишигбатын Эрдэнэт-Одын гадаад паспортын хугацаа дууссан байжээ.
Монгол Улсын Ерөнхий сайд, экс Ерөнхийлөгчийн болон Токиог зорих тамирчин, дасгалжуулагч гээд олон зуун хүнийг хүлээлгэсэн Х.Эрдэнэт-Од гавьяат хэнэггүй гэхэд дэндүү аж. Олон улсын тэмцээн уралдаанд байнга нааш, цааш нисэж байдаг түүний хувьд гадаад паспортынхаа хугацааг харчих, дээр нь зуны олимпийн их наадамд улсаа төлөөлөн явж байгаагийн хувьд хувийн бэлтгэлээ хангачих хэмжээний хариуцлага, ёс зүй түүнд байдаггүй гэж үү.
Ямартай ч, энэ удаад асуудлыг зохицуулж, гавьяат Х.Эрдэнэт-Од Токио руу ниссэн ч дахин ийм явдал давтагдахгүй гэдэгт найдаж байна. Олон улсын нислэг секунд, минутаар хэмжигддэг. Эс бөгөөс тухайн улсын нислэгийн компани асар их хэмжээний өр, зээлд ордог учиртай. Харин Х.Эрдэнэт-Од гавьяатын энэ мэт байж боломгүй үйлдэл Монгол Улсын цаашлаад Токиогийн олимпийн нээлтэд оролцохоор яваа Засгийн газрын тэргүүний нэр хүндэд сэв суулгах нь тодорхой.
Б.Жаргал
Сэтгэгдэл (43)