“Токио-2020” зуны олимпийн наадмын сагсан бөмбөгийн 3х3 төрөлд эрх орноо төлөөлөн оролцох Монгол Улсын шигшээ багийн дөрвөн тоглогчийг сонгохдоо шударга бус хандсан хэмээн олон хүн үзэж байна. Даргын охиныг арын хаалгаар сонголоо гэж. Тэгвэл шигшээ багт тоглох эрхээ авсан Цэрэнлхамын аав Баянхонгор аймгийн Засаг дарга Д.Мөнхсайхантай ярилцлаа.

-Олимпийн наадмын 3х3 сагсан бөмбөгийн үндэсний шигшээ багийн гарааны бүрэлдэхүүнд багтсан М.Цэрэнлхам таны охин уу?

-Тийм ээ. 

-Таныг албан тушаалын байдлаа ашиглан төрсөн охиноо олимпийн шигшээ багт оруулсан хэмээн үзэх хүн байна. Энэ тал дээр юу хэлэх вэ?

-Үгүй дээ. Би спортыг шударга талбар чигтээ орших ёстой гэж үздэг. Энд арын хаалга огт байх ёсгүй. Тэглээ ч миний мэдлээс давсан зүйл байна. Түмний хүүхдийг ялгаж болдоггүй юм. Дараа нь үйлийн үр хатуу ирэх учраас. Гол нь олимпийн шигшээ багт муу тоглогч дуудаагүй байх. Бүгд сайн байсан болохоор олимпийн эрхээ авсан гэж ойлгож байна.

-Хасагдсан гэх хоёр охины гэр бүлийнхэн сонгон шалгаруулалтын үр дүнг хүлээн зөвшөөрөхгүй байгаа?

-Шигшээ багийнхаа үндсэн тамирчидаа санал хураалтаар сонгосон юм билээ. Надад нарийн мэдэж байгаа зүйл алга. Охинтойгоо утсаар ярихад хэлсэн зүйл нь энэ. Хэл амнаас хол байвал заяа төөргөөрөө болох биз дээ. 

-М.Цэрэнлхам сонгон шалгаруулалтаас хэдээр гарсан бэ?

-Хүмүүс саналаа нэгтгэн дүнгээ гаргахад нэгээр Хулан, дараа нь миний охин гарчээ. Бэлтгэлд ирсэн байдал, бэртэл гэмтэл зэрэг олон хүчин зүйлээс хамаарч шийдвэрээ танилцуулсан гэсэн.

-Сонгон шалгаруулалтын өмнө охиндоо юу хэлж зөвлөсөн бэ?

-“Шигшээ багт орохгүй бол сэтгэл санаагаар унаж болохгүй. Олимпод тоглох боломжгүй болвол цаана нь олон боломж гарна” гэж сэтгэл зүйн тал дээр анхаарсан. Цаашлаад дэлхийн шилдэг багуудтай тоглох учраас аль болох тайван байлгах хэрэгтэй.

-Цэрэнлхам сагсан бөмбөгтөө багаасаа дуртай байсан уу?

-Би охиноо волейболчин болгох гээд дийлээгүй юм. Миний аав волейболын олон улсын хэмжээний мастер хүн. Тэгээд Солонгоо багшид анх шавь оруулж, “Алтайн барс” клубт ч бэлтгэл сургуулилт хийгээд аятайхан болж байтал сагсан бөмбөг рүү зугтсан даа. Ер нь сагсан бөмбөг гэлтгүй спортод жигтэйхэн дуртай хүн дээ. Нэг өдөр гандболын улсын аварга шалгаруулах тэмцээнд хаалгач хийгээд алтан медаль авлаа гээд ирж билээ.   

Б.Жаргал