Улсын ерөнхий прокурорын газрын Олон нийттэй харилцах албанаас өнөөдөр Монгол Улсын Гавьяат тамирчин Н.Түвшинбаяртай холбоотой мэдэгдэл гаргалаа. Мэдэгдэлд “Н.Түвшинбаярт холбогдох хэрэгт Хан-Уул дүүргийн прокурорын газраас хяналт тавьж байна. Эрүүгийн хууль хянан шийдвэрлэх тухай хуульд зааснаар гэмт хэрэг гарсан байдлыг бүрэн тогтоохын тулд хохирогч болон хохирогчийн хууль ёсны төлөөлөгчөөс зайлшгүй мэдүүлэг авах шаардлагатай. Энэ ажиллагаа хүлээгдэж байна” гэв.

Тодруулбал, хохирогч Э.Энхбатаас болсон явдлын талаар мэдээлэл авах зайлшгүй шаардлагатай ба маргаан, зодоон юунаас үүдэлтэйг тогтоосноор хэргийн хувь заяа хаашаа эргэх нь тодорхой болох юм.

Улсын начин Э.Энхбат эрүүл саруул болж, хөл дээрээ боссон тохиолдолд Н.Түвшинбаярын ял хөнгөрнө. Өдгөө прокуророос түүнд санаатайгаар бусдын биед хүнд гэмтэл учруулсан хэрэгт нь 5-7 жилийн хорих ял төлөвлөөд буй.

Хар багын найз, үргэлж хамгаалж, түшиж ирсэн гэдэг утгаараа Э.Энхбат начин Н.Түвшинбаярт гомдолгүй гэсэн ч прокурор үүнийг хэрэгсэхгүй. Өмнө хохирогч гомдолгүй хэмээн мэдүүлсэн тохиолдолд хэргийг хэрэгсэхгүй болгодог байв. Харин Эрүүгийн шинэ хуулийн нэмэлт өөрчлөлтөөр хохирогч гомдолгүй гэсэн ч үйлдэлд нь ял оноодог болсон. Тиймээс Н.Түвшинбаяр  ухамсаргүй энэ үйлдэлдээ хариуцлага хүлээж таарна.

Согтуугийн омгоор багын найзаа хэвтэрт ортол зодон танхайрч, Токиогийн зуны олимпийн өмнөхөн МҮОХ-ны Ерөнхийлөгчийн албан тушаалаасаа буун, өдгөө олны нүднээс нуугдан амьдарч байгаа Н.Түвшинбаяр халаглаад, харамсаад ч цаг хугацааг буцаах боломжгүй юм.

У.Тэргэл