М.Билэгтийн “Ачлал Оточ” хавдрын эмнэлэг нэрээ өөрчилж, Дөрөвдүгээр эмнэлэг болсон ч хэл амнаас бултаж чадсангүй

Хавдар судлалын үндэсний төвтэй газрын маргаан үүсгэж, “Шударгаар өрсөлдөе” хэмээн шуугиан тарьж буй Дөрөвдүгээр эмнэлэг эхнээсээ л олны хэл аманд өртөж байжээ. “Ачлал Оточ” хавдрын эмнэлэг нэрээр анх суурь нь тавигдсан Дөрөвдүгээр эмнэлгийн “босс” нь УИХ-ын гишүүн асан М.Билэгт аж.

Тодотговол, М.Билэгтийн эзэмшлийн “Ачлал трейд” компани ХСҮТ-ийн дэргэд 11 мянган метр квадрат талбай бүхий 300 ортой эмнэлгийн барилгын цогцолбор байгуулахаар 2010 онд эмнэлгийн суурийг тавьж, улмаар 2017 онд Хөгжлийн банкнаас 12.5 сая ам.долларын буюу тухайн үед 33 орчим тэрбум төгрөгийн зээл авч тус эмнэлгийн барилгыг барьсан түүхтэй.

Нарийвчилвал, Хөгжлийн банкны Зээлийн удирдлагын хорооны №2017/75, Хөгжлийн банкны ТУЗ-ийн №75 тоот шийдвэрээр тус зээлийг олгож байсан байна.

Нэлээд өндөр өртгөөр баригдсан гэх гишүүн асан М.Билэгтийн дээрх барилгыг төр буюу ХСҮТ түрээслэх, цаашлаад төр худалдан авах тухай яриа хэлэлцээ хүртэл Засгийн газар, УИХ-ын түвшинд яригдаж, түрээсийн гэрээ хүртэл байгуулаад амжсан байдаг. Харин энэ нь олны анхааралд өртөж, асуудал дагуулсан учир тэгэсхийгээд намжиж байсан юм.

Ийнхүү төрд барьсан эмнэлгээ шахаж дөнгөөгүй М.Билэгт зүгээр суусангүй эмнэлгийн нэрээ өөрчилж, Дөрөвдүгээр эмнэлэг хэмээн нэрийдэж, өдгөө ХСҮТ-тэй өрсөлдөж эхлэв бололтой.

Хэдхэн хоногийн өмнө Дөрөвдүгээр эмнэлгийнхэн "ХСҮТ-ийнхэн өвчтэй хүмүүсийн эрх ашгийг зөрчиж, хаалт босгож байна, шударга өрсөлдье" хэмээн цахим сүлжээнд дуулиан дэгдээсэн билээ. Улмаар ШӨХТГ-ын дарга Б.Бат-Эрдэнэ болон холбогдох албаныхан газар дээр нь очиж сүрийг үзүүлсэн нь мөн л олны шүүмжлэлд өртсөн.

Түүнчлэн “Ачлал трейд” ХХК “Ачлал Оточ” хавдрын эмнэлгийн нэрээ өөрчилж, Дөрөвдүгээр эмнэлэг нэрээр олонд танигдаж байгаа нь иргэдийг төөрөгдүүлж байгаа аж. Учир нь Нэг, Хоёр, Гуравдугаар эмнэлэг нь улсын эмнэлэг, харин дөрөвдүгээр эмнэлэг гэхээр иргэд улсын эмнэлэг гэж андуурах явдал гарч байна гэдгийг иргэд хэлж буй юм.  

“Бүгдэд үйлчилнэ” уриатай Энэрмэд буюу Дөрөвдүгээр эмнэлэг нь хавдрын оношилгоо, эмчилгээ үзүүлэх 120 ортой 12 давхар А блок, 180 ортой 16 давхар Б блок, эмийн сан, эрүүл мэндийн судалгааны байгууламжаас бүрджээ.

Тус эмнэлгийн Ерөнхий захирал нь М.Билэгт бол гүйцэтгэх захирлаар нь Б.Золжаргал ажилладаг байна. Харин Эмчилгээ эрхэлсэн захирал Н.Оргил,Бизнес хөгжил хариуцсан захирал У.Түмэндэлгэр бол Сургалт, хамтын ажиллагаа хариуцсан менежерээр А.Гиймэл ажилладаг байна.

Тус эмнэлэг нь өдгөө коронавирусний халдвараар өвчлөөд эдгэрсэн иргэдэд халдварын дараах эмчилгээ үйлчилгээг үзүүлж байгаа аж.

Б.Баатар