Өнгөрсөн долоодугаар сарын дөрөвний өдөр коронавирусний халдвараар өвдсөн иргэн “Энэрэл” эмнэлгийн гадна нас барсан харамсалтай хэрэг гарсан билээ.

Олны сэтгэлийг сэрд хийлгэсэн тухай үеийн нөхцөл байдлыг нийслэлийн Эрүүл мэндийн газрын дарга Б.Бямбадорж тайлбарлахдаа талийгаачийг олон хоног архи уусан, тохиромжгүй нөхцөлд ажиллаж, амьдардаг, өрхийн эмнэлэг нь ойрхон байсан ч түүгээр үйлчлүүлээгүй зэргээр хүний нэр төрийг гутаан доромжилсон шинжтэй мэдээлэл өгч олны дургүйцлийг төрүүлсэн.

Тиймээс ХЭҮК-оос нийслэлийн Засаг дарга Д.Сумъяабазарт нийслэлийн Эрүүл мэндийн газрын дарга Б.Бямбадоржид хариуцлага тооцох шаардлага хүргүүлсэн байна.

Энэ дагуу нийслэлийн Эрүүл мэндийн газрын дарга Б.Бямбадоржид хэвлэл мэдээллийн хэрэгслээр мэдээлэл өгөхдөө хүний нэр төр, алдар хүнд, хувийн нууцыг хүндэтгэж ажиллахыг сануулах арга хэмжээ авчээ. 

Угтаа хувь хүний нууцад халдах, хувь хүний нууцыг задруулах нь Эрүүгийн хуульд заасан гэмт хэргийн шинжтэй үйлдэл юм. 

Ямартай ч энэ удаад НЭМГ-ын дарга Б.Бямбадорж суудалдаа үлдэж, сануулах арга хэмжээ авахуулаад өнгөрлөө. Харин тэрбээр ахин эл мэт үйлдэл гаргаж, хариуцлага алдвал үүрэгт ажлаасаа чөлөөлөгдөх нь. 

Б.Баатар