Боловсрол, шинжлэх ухааны сайд Л.Энх-Амгалан хэдхэн хоногийн өмнө Монголын Үндэсний их сургууль гэсэн нэрийг төрд буцааж авахаа мэдэгдсэн. Тэгвэл өнөөдөр Монголын Үндэсний их сургуулиас мэдээлэл хийж, Боловсрол, шинжлэх ухааны сайд Л.Энх-Амгаланг уучлалт гуйхыг шаардав. 

БШУ-ны сайд Л.Энх-Амгалан МҮИС-ийг луйвар хийдэг хэмээн мэдэгдсэн нь гүтгэж, доромжилсон үйлдэл болсон. Тиймээс МҮИС-иас бизнесийн нэр хүндээ хамгаалахаар Сүхбаатар дүүргийн Иргэний хэргийн шүүхэд хандаж байгаагаа мэдэгдлээ. 

Түүнчлэн энэ үеэр МҮИС-ийн багш Б.Отгонбаяр “Сайд маань өөрөө 10-хан секунд үг хэлэхдээ Монголын Үндэсний Улсын их сургууль гээд манай нэрийг гуйвуулж хэлж байна. Уг нь У, Ү үсэг тусдаа ялгаатай. Боловсролын сайд та хөдөө орон нутгийн залуучууд, эцэг эхчүүд, багш нараас яг одоо уучлалт гуй. Хэрвээ уучлалт гуйж чадахгүй бол энэ багш нар болон хөдөө орон нутгийн залуучуудын нэрийн өмнөөс би ямар нэгэн байдлаар тэмцлийн хурц хэлбэрт шилжих болно. Магадгүй миний хэлсэн үгийг үг гэж тоохгүй бол би өөрийгөө зулын гол болгоход ч бэлэн байгаа шүү” гэлээ.

Б.Баатар