Европын холбооны “European International Women's Leadership Award 2021” шагнал хүртсэн анхны монгол эмэгтэй Болдын Оюунтүлхүүртэй ярилцлаа.
-Та “European International Women's Leadership Award 2021” шагнал хүртсэн анхны монгол хүн болж байна. Танд халуун баяр хүргэе. Шагнал хүртсэн тухай дуулахад танд юу бодогдсон бэ?
-Баярлалаа. Би Бельги улсад ирсэн бараг анхны монгол хүн болохоор өдийг хүртэл олон юманд анхдагч байлаа. Энэ шагналд нэр дэвшсэн хүмүүстэй хоёр жил орчмын өмнө холбоо тогтоосон. Шагнал гардуулах тухай мэдээг надад анх дуулгахдаа “Таныг болон өөр найман эмэгтэйг сонгож байна” гэхэд нь их гайхсан, сандарсан, бас баярласан. Монгол эмэгтэй хүн энэ том шагналыг авсан гэж бодохоор Монголынхоо нийт эмэгтэйчүүдийнхээ өмнөөс баярлаж, өөрөөрөө бахархсан.
-Шагнал гардуулах ёслолын ажиллагаа хэрхэн болж өнгөрсөн бэ?
-Өнгөрсөн жилийн “Март-8”-ны баяраар болох ёстой байсан энэхүү шагнал гардуулах ёслолын ажиллагаа цар тахлын улмаас хойшлогдоод байв. Уг нь Европын парламент дээр болдог боловч дээрх шалтгаанаас болж Европын холбооны дэргэдэх Эссены төлөөлөгчийн газрын байранд болсон. Шагнал гардуулахын эхэнд өмнө нь шагнуулж байсан эмэгтэйчүүд өнөө жил шагнал авах хүмүүсийг танилцууллаа. Дараа нь таеквондогийн дэлхийн аварга Умниа Даккон миний танилцуулгыг уншсан. Миний хувьд нэр төрийн хэрэг байлаа.
-Энэ шагналыг ямар шалгуураар олгосон бэ?
-Дарамттай ёс заншлын үүргээс чөлөөлөгдөх хүсэлтэй, зөвхөн эрчүүд зонхилдог салбарт хүчээ үзэх сонирхол, зоригтой, өөрт байгаа боломжийг гаргаж амжаагүй, эсвэл тэрийгээ гаргахаасаа эмээдэг олон эмэгтэйчүүдэд үлгэр дуурайлал болох, өөрсдийн мөрөөдлийг биелүүлэхийн тулд зориглон амьдрал, ажил төрлөө өөрчлөхийн төлөө тэмцсэн эмэгтэйчүүдийг урамшуулах зорилго агуулсан шагнал юм. Шагнал гардан авсан бусад хүний шалгуур өөр байсан байх.
-Таныг Бельгийн Боловсрол, соёлын сайдын зөвлөхөөр ажилладаг гэж байна. Эрхэлж буй ажлынхаа талаар товчхон танилцуулахгүй юу?
-Би одоогоор Бельгийн франц хэлтэй хэсгийн Ерөнхий сайд Пьер-Ив Жеолегийн кабинетэд ажиллаж байна. Сайдын кабинетийг парламенттай холбож, Сайд нарын зөвлөлийн хурал болон Байнгын комиссын ажлын бэлтгэлийг хангахад оролцоно.
-Таныг Бельги дэх “Монгол соёлын төв” төрийн бус байгууллагын тэргүүн гэж сонслоо. Монгол соёлыг гадныханд сурталчлан таниулах талаар ямар ажил өрнүүлж байна вэ?
-Энэ асуултанд хариулахын тулд нэг зүйлийг тодотгож хэлмээр санагдаж байна. Гадныхан бидний нэрийг цээжлэхээс илүүтэй монгол гэдгээр нь л тогтоодог. Тэгэхээр гадаадад амьдарч байгаа, түр айлчилж байгаа хэн боловч өөрийгөө Монгол улсынхаа соёл, зан заншлын элч гэж бодох хэрэгтэй юм. Монголчуудыг тэсвэр хатуужилтай, уйгагүй, найдвартай хүмүүс хэмээн ажил олгогчид үнэлдэг. Би ажлынхандаа бууз чимхэхийг заахаас авахуулаад товч зангидахыг хүртэл заасан. Аливаа зүйлийг хүнд таниулж ойлгуулахын тулд бага гэж голж болохгүй юм. Бельги улсад монголчуудын эрхэлж буй олон төрийн бус байгууллага идэвхтэй ажиллаж байна. Бид хамтран үндэснийхээ өв соёл болох Баяр наадмаа сайхан тэмдэглэдэг. Манай төвийн хувьд Монголын байт харвааны шигшээ багийг олон улсын тэмцээн уралдаанд орохын өмнө Бельгид хэд хоног бэлтгэл хийх боломжоор хангаж өгсөн ч удаатай. Мөн олон улсын марафон гүйлтийн тэмцээнд уралдсан хөгжлийн бэрхшээлтэй баг тамирчидаа энэ улсын Парламентын депутат болон Хөгжлийн бэрхшээлтэй иргэдэд туслах сангийн ерөнхийлэгчтэй хүртэл уулзуулсан. Мөн жил бүр Бельгийн нум сур харвалтын клубтэй хамтран Монголын өнчин болон гэр оронгүй хүүхдүүдэд туслах сан босгох өдөрлөг зохион байгуулж байсан. Цаашид ч зохиох бодолтой байгаа.
-Та аав, ээждээ шагнал авсан тухайгаа дуулгасан уу?
–Аав, ээж маань намайг хамгийн ихээр дэмждэг. Тэд намайг шагнал авах үед нойроо хугаслан байж үзсэн байна.
-Аав, ээжийгээ танилцуулахгүй юу?
-Ээж маань Цэргийн ансамблийн дуучин хүн. Харин аав улс орон маань үндэсний үйлдвэртэй байх үед Төлөвлөгөөний Комисст ажиллаж байсан. Би урлаг, спортод туйлын дуртай болохоор урлаг, спортынхныг хүндэлж, чадах ядахаараа дэмжихийг хүсч явдаг даа. Өдий насандаа энгэрт нь эрхлэх ээж, аавтай болохоор өөрийгөө их азтай хүн гэж боддог.
-Ярилцлага өгсөн танд баярлалаа.
Б.Жаргал
