Өнгөрсөн гурав хоногт Засгийн газрын тохируулагч агентлаг болох Харилцаа холбоо, мэдээллийн технологийн газраас зохион байгуулж буй "DITITAL NATION 2021" гэх арга хэмжээ болж Үндэсний соёл амралтын хүрээлэнд нүсэр шоу болж өнгөрлөө. Нийтийг хамруулсан уг арга хэмжээг Нийслэлийн Онцгой комисс эсэргүүцсэн бол Улсын Онцгой комисс халвар хамгааллын дэглэмийг чанд сахиулж зохион байгуулах эрх өгсөн нь шүүмжлэл дагуулаад буй. 

Энэ арга хэмжээнд Ерөнхий сайд Л.Оюун-Эрдэнэ өөрөө түүчээлж, Засгийн газрын гишүүдтэйгээ оролцсон гэдгийг цохон тэмдэглэе.

Мэдээж масктай, маскгүй олон мянган хүнийг цуглуулсан тул халдварын тоо огцом нэмэгдэх нь ойлгомжтой. Өнөөдөр ковид-оор өвдсөн олон мянган хүн орны хүрэлцээ муутайн улмаас гэрээрээ эмчлүүлж, түүнээс цөөнгүй нь нас барж байна. Эрүүл мэндийн салбарынхан ч гэр бүл, үр хүүхдээ умартан уг өвчинтэй өдөр шөнөгүй тэмцэж байхад төр нь өөрөө дэглэмээ зөрчиж, хавтгайруулж байгаа нь харамсалтай.

Одоо бүртгэгдэж байгаа халдварын дийлэнх нь Дельта вирусний хувилбар. Энэ вирус нь халдвартай иргэний хажуугаар маскгүй зөрж өнгөрөхөд л өвчлүүлэх эрсдэлтэй гэсэн үг юм.

Олон нийтийг хамарсан арга хэмжээг хориглоно л гэсэн. Гэтэл яав. Өнгөрсөн хугацаанд төр л өөрөө өөрийнхөө гаргасан шийдвэрийг үгүйсгэж, түүнийгээ зөрчиж ирлээ. Энэ удаад ч ялгаагүй. Тиймээс Л.Оюун-Эрдэнэ сайд аа, "мөлхөж" яваа эдийн засагтай мөртлөө цагаа олоогүй зугаанд хэчнээн төгрөг зарцуулснаа тайлагнаад олон хүний амь насыг эрсдэлд оруулж, иргэдээр дайжигнасандаа уучлалт гуйж, өмнөх Ерөнхий сайдын үлдээсэн соёлыг үргэлжлүүлэхийг хүсэж байна.

Б.Лхам