Автотээврийн үндэсний төв ТӨҮГ нь Авто үйлчилгээний мэдээллийн сан ашиглалтад оруулаад багагүй хугацаа өнгөрөөд байна.

Мэдээллийн сангийн зорилго

• Авто үйлчилгээний чиглэлээр үйл ажиллагаа эрхлэгч аж ахуйн нэгж байгууллага, иргэдэд авто үйлчилгээний ангилал тогтоох үйл ажиллагаа хүндрэл чирэгдэлгүй түргэн шуурхай үзүүлэх

• Ангилал тогтоолгосон авто үйлчилгээний байгууллагуудын үйл ажиллагааны талаар дэлгэрэнгүй мэдээллийг иргэн, олон нийтэд нэг дороос хүргэх

• Тээврийн хэрэгслийн засвар, үйлчилгээний түүхчилсэн бүртгэл үүсгэх

• Тээврийн хэрэгслийн ашиглалтын хугацаанд холбогдсон засвар үйлчилгээ болон ашиглалтын бусад мэдээллээр олон нийтийг хангах

Одоогоор Авто үйлчилгээний мэдээллийн санд нийт ангилал тогтоолгосон 507 авто үйлчилгээний байгууллага бүртгэгдэж 22000 тээврийн хэрэгслийн 27838 засвар үйлчилгээний түүх үүсээд байна.

Авто үйлчилгээний мэдээллийн сангийн программ хангамж нь вэбд суурилсан ба AUTOBOX.MN сайтаар дамжуулан ажилладаг бөгөөд тус сангийн сервер нь “Үндэсний дата төв”-д байршиж Төрийн цахим мэдээлэл солилцооны системээр дамжуулан дараах мэдээллийн сангуудтай холбогдоод байна.

• Татварын ерөнхий газрын мэдээллийн сан

• Гаалийн ерөнхий газрын мэдээллийн сан

• Тээврийн хэрэгслийн бүртгэлийн мэдээллийн сан

• Техникийн хяналтын үзлэгийн мэдээллийн сан

• Торгуулийн мэдээллийн сан

Авто үйлчилгээний мэдээллийн сан ашиглалтад орсноор иргэд, олон нийт дараах олон төрлийн үйлчилгээ хүндрэл чирэгдэлгүй, түргэн шуурхай авах боломжтой болсон.

Авто үйлчилгээний байгууллага

• Нэгж тээврийн хэрэгсэл тус бүрийн ашиглалтын түүхтэй танилцсанаар тухайн тээврийн хэрэгслийг оношлох, засвар үйлчилгээг хийхэд хялбар болсон.

• Тус мэдээллийн сангаар дамжуулан өөрийн байгууллагын үйл ажиллагааг олон нийтэд үнэ төлбөргүйгээр сурталчлах, бүтээгдэхүүн, үйлчилгээндээ цахим хэлбэрээр урьдчилсан захиалга авах

• Өөрийн байгууллагын хийж гүйцэтгэсэн засвар, үйлчилгээний талаар бүртгэл хөтлөх тэдгээрт цахим хэлбэрээр баталгаа гаргах

• Авто үйлчилгээний ангилал тогтоолгох үйл ажиллагааг цахим хэлбэрээр авах

Иргэдэд

• Автотээврийн хэрэгслийн ашиглалтын хугацаанд холбогдсон /тээврийн хэрэгслийн өмнө хэдэн эзэмшигчтэй байсан, хязгаарлалт, торгууль, татвар, импортоор орж ирэх үеийн дэлгэрэнгүй мэдээлэл, засвар үйлчилгээний мэдээлэл, техникийн хяналтын үзлэг/ мэдээлэлтэй нэг дороос түргэн шуурхай танилцах

• Ангилал тогтоолгосон аж ахуйн нэгж байгууллага, иргэдийн үйл ажиллагааны талаарх дэлгэрэнгүй мэдээлэлтэй танилцсанаар өөрт хамгийн ойр боломжит авто үйлчилгээний байгууллагуудаас сонголт хийн урьдчилан захиалга өгөх

• Тээврийн хэрэгслийн техникийн хяналтын үзлэг болон бүртгэлийн үйл ажиллагаатай холбоотой төлбөр хураамж цахим хэлбэрээр төлөх

• Өөрийн тээврийн хэрэгсэлд хийгдсэн засвар үйлчилгээнд хяналт тавих гэх мэт боломжтой.