Нэгдсэн Үндэсний Байгууллагын Ерөнхий нарийн бичгийн дарга Антонио Мануэл дэ Оливейра Гутеррешийн Монгол Улсад хийх айлчлал өнөөдөр эхэлж байна. Монгол Улс НҮБ-д элссэний 60 жилийн ой өнгөрсөн онд тохиосон. Үүнийг тохиолдуулан Монгол Улсын Ерөнхийлөгч У.Хүрэлсүхийн урилгаар ийнхүү айлчилж байгаа билээ. Ингээд уншигч та бүхэнд Антонио Гутеррештэй холбоотой сонирхолтой таван баримтыг хүргэж байна.

БАРИМТ 1. Антонио Гутерреш номын хорхойтой нэгэн. Вашингтонд зочлох бүрдээ "Politics & Prose" номын дэлгүүрт очиж Европоос олоход амаргүй англи номуудыг хайж олоход ихэнх цагаа зориулдаг хэмээн НҮБ-ийн Дүрвэгсдийн асуудал эрхэлсэн дээд комиссар, доктор Мишель Габаудан хэлж байсан.

БАРИМТ 2. Монгол Улсын Ерөнхийлөгч У.Хүрэлсүх өнгөрсөн аравдугаар сард болсон “Тэрбум мод” төслийн зарлигаа танилцуулах үедээ НҮБ-ийн Ерөнхий нарийн бичгийн дарга Антонио Гутеррешийн нэрийг өмнөх дарга асан Кофи Аннантай андуурч хэлж байсныг та бүхэн санаж байгаа байх. Тэрбээр “Би сая НҮБ-ын хуралд оролцохдоо НҮБ-ын Ерөнхий нарийн бичгийн дарга Кофи Аннантай уулзсан” хэмээн хэвлэлийнхэнд яриад амжсан.

БАРИМТ 3. Антонио Гутерреш өмнө нь Португалийн парламентад 17 жил ажилласан бөгөөд 1995-2002 онд Португалийн Ерөнхий сайдын албыг хашиж байсан. 1991 онд Ерөнхий сайд болохын өмнө Португалийн дүрвэгсдийн зөвлөлийг байгуулсан нь түүний нэр хүнд өсөхөд нөлөөлсөн. Тэрбээр өмнө нь Засгийн газрын тэргүүнээр ажиллаж байсан түүхэн дэх НҮБ-ийн анхны Ерөнхий нарийн бичгийн дарга юм.

БАРИМТ 4. Антонио Гутерреш нь Португал улсын Лиссабон хотод төрсөн бөгөөд төрөлх португал хэлээсээ гадна англи, франц, испани хэлээр чөлөөтэй ярьдаг. Тэрээр Португалийн Instituto Superior Técnico сургуулийг инженер мэргэжлээр төгссөн.

БАРИМТ 5. 2018 оны наймдугаар сард Йеменд болсон агаарын дайралтын үеэр сургуулийн насны 40 орчим хүүхэд, энгийн иргэд нийлээд 51 хүн амь үрэгдсэн. Антонио Гутерреш энэ хэргийг өөрөө бие даан мөрдөн шалгах ажиллагаа явуулж байжээ.

Т.Мөнхжаргал