Хичээлийн шинэ жил эхэллээ. Есдүгээр сарын нэгэн гэдэг оюутан сурагчдын хувьд цоо шинэ бүхний эхлэл. Анги дэвшиж том болсноо, амралтаараа хэрхэн амарснаа, ямар шинэ адал явдалтай учирснаа найзууддаа ярьж, санасан сэтгэлээр уулзах баярт өдөр.

Шинэ зууны анхны хичээлийн жилийг улс орон даяар өргөн хүрээнд тэмдэглэн өнгөрүүллээ. Энэ бол Монголчуудын түүхэнд шинэ хуудас нээх эхлэл. Өнгөрсөн жил боловсролын салбар үүсч хөгжсөний 100 дахь хичээлийн шинэ жилийн нээлт тохиож улс орон даяар анх удаа цахим нээлтэд оролцож байлаа. Харин энэ жил уламжлал ёсоор багш, сургуулийн удирдлагууд сурагч, оюутнуудаа төрөлх сургуулийнхаа үүдэнд угтаж авсан юм. Манай сайтын сурвалжлах баг МУИС-ийг зорьсон юм. Монгол Улсын ууган сургуулийн түүхт 80 жилийн ой энэ жил тохиож байна. Энэ хүрээнд хичээлийн шинэ жилийн нээлт өргөн хүрээнд зохион байгуулагдав. Биднийг очиход хичээлийн нэгдүгээр байрны гадна нээлт үзэхээр ирсэн оюутнууд дүүрэн байлаа. 80 дахь удаагийн хичээлийн нээлтэд Монгол Улсын Ерөнхийлөгч У.Хүрэлсүх, БШУ-ны сайд Л.Энх-Амгалан нар оролцлоо. Энэ үеэр сургуулийнхаа нээлтэд оролцож байгаа оюутнуудын сэтгэгдлийг сонслоо.

МУИС-ийн шинэ элсэгч Б.Сувд-Эрдэнэ

Намайг Б.Сувд-Эрдэнэ гэдэг. Би Дархан-Уул аймгаас ирсэн. МУИС-д орохыг үнэхээр хүсч байсан болоод ч тэр үү, удаан хүлээсэн. Эцэст нь сургуульдаа элсэж орсондоо үнэхээр их баяртай байгаа. Миний хувьд Олон улсын харилцаагаар суралцах төлөвлөгөөтэй ирсэн. Арван жилдээ баймаар л санагдаж байна. Би ангиасаа ганцаараа МУИС-т элссэн. Тийм болохоор бага зэрэг айж, сандарч байна. Ирээд бага зэрэг төөрсөн. Ангиа олохгүй, сургуулийн байраа олохгүй төөрсөн. Тэр үедээ утсаараа хайгаад, хүмүүсээс тусламж гуйсан. Гэхдээ хүссэн мэргэжлээрээ суралцах болохоор үнэхээр гоё.

МУИС-ийн Улс төр судлалын тэнхимийн гуравдугаар түвшний оюутан У.Тэргэл

Оюутны хувьд дүнгийн голчоо ахиулж тэтгэлэгт хөтөлбөрт хамрагдах, мэргэжлийнхээ хүрээнд олон судалгааг хийх зорилготойгоор энэ хичээлийн жилийг эхлүүлж байна. Намайг анх оюутан болсон жил цар тахлын хөл хориотой үе таарсан учраас хичээлийн шинэ жилийн нээлт болж байгаагүй. Түүний дараа жил ч бас. Харин энэ жил анх удаа хичээлийн шинэ жилийн нээлтээ үзлээ. Олон шинэ элсэгчид сургуульд маань элссэн байгаад баяртай байна. Хичээлийн эхний өдөр нар хур тэгширсэн сайхан эхэллээ. Энэ эрчээрээ суралцаад, олон сайхан дурсамжтай нэг жилийг өнгөрүүлэхийг хүсч байна.

МУИС-ийн Мэдээллийн технологийн гуравдугаар түвшний оюутан Э.Мөнхжаргал

Шинэ хичээлийн жилийн нээлт өргөн цар хүрээнд болж байна. Энэ жил МУИС-ийн түүхт 80 жилийн ой тохиож байгаа юм. Миний хувьд их сургуульд элссэнээс хойш анхны нээлтээ үзэж байна. Зуны амралтаараа мэргэжлийн дадлагаа хийж, ажил хийж өнгөрүүллээ. Энэ хичээлийн жил үзэхээр төлөвлөсөн 32 багц цагаа амжилттай дүүргэх төлөвлөгөөтэй эхлүүлж байна.

Т.Мөнхжаргал