АНУ-ын жүжигчин, хөгжлийн бэрхшээлтэй хүмүүсийн эрхийг хамгаалагч Р.Ж.Митте 34 насандаа таалал төгссөн талаар түүний төлөөлөгчид аравдугаар сарын 12-нд мэдээлжээ. Тэрбээр “Breaking Bad” цувралд Уолтер Уайтын хүү Уолтер “Флинн” Уайт Жуниорын дүрийг бүтээснээр дэлхий даяар танигдсан юм. Митте АНУ-ын Техас мужийн Браунсвилл хотод нас барсан бөгөөд одоогоор нас барсан шалтгааныг албан ёсоор мэдээлээгүй байна. Цагдаагийн байгууллага уг хэргийг шалгаж байгаа бөгөөд гаднын нөлөө байсан гэх урьдчилсан шинж тэмдэг илрээгүй талаар хэвлэлүүд мэдээлжээ.

Миттегийн төлөөлөгчид түүнийг жүжигчин төдийгүй буяны үйлсэд оролцогч, хөгжлийн бэрхшээлтэй хүмүүсийн эрхийн төлөө тууштай дуу хоолойгоо хүргэж ирсэн хүн хэмээн дурссан байна. Рой Фрэнк Митте III буюу Р.Ж.Митте 1992 онд АНУ-ын Миссисипи мужийн Жэксон хотод төрж, жүжигчний карьераа эхлүүлэхээр 2006 онд Лос-Анжелес хотод очсон байна. Тэрбээр гурван настайдаа тархины саажилттай гэж оношлогджээ.

15 настайдаа “Breaking Bad” цувралд тоглож эхэлсэн бөгөөд 2008-2013 онд дэлгэцнээ гарсан таван улирлын турш Уолтер Уайтын хүүгийн дүрийг бүтээсэн юм. Түүний дүр эхэндээ эцгээ биширдэг өсвөр насны хүү байсан ч гэр бүлийнх нь амьдрал өөрчлөгдөж, эцгийнх нь нууц илчлэгдэхийн хэрээр хүнд сонголт, зөрчилтэй нүүр тулдаг. 

Митте өөрөө тархины саажилттай байсан нь дүрдээ бодит мэдрэмж, үнэмшилтэй байдлыг бий болгоход нөлөөлжээ. Тэрбээр өөрийн туршлагаа ашиглан хөгжлийн бэрхшээлтэй хүмүүсийн амьдрал, нийгэмд тулгардаг бэрхшээл, тэднийг дэлгэцээр хэрхэн төлөөлөх талаар олон нийтэд ярьдаг байв.

“Breaking Bad” цувралын дараа тэрбээр “Switched at Birth”, “The Guardians of Justice” зэрэг бүтээлд тоглож, кино урлагийн салбарт үргэлжлүүлэн ажилласан. Мөн хөгжлийн бэрхшээлтэй хүмүүсийг дэмждэг "United Cerebral Palsy" болон "Shriners Children’s" байгууллагуудын элчээр ажиллаж, өөрийн нэрэмжит сангаар дамжуулан буяны болон олон нийтийн үйл ажиллагаанд оролцож байжээ.

Түүний нас барсан тухай мэдээний дараа “Breaking Bad” цувралын хамтран тоглогчид эмгэнэл илэрхийлсэн байна. Жүжигчин Аарон Пол түүнийг найзынхаа хувьд үгүйлэх болно хэмээн дурдсан бол Дин Норрис Миттег зураг авалтын талбайд өсөж буй залуу байхаас нь мэддэг байсан бөгөөд түүнийг сайхан сэтгэлтэй хүн байсныг онцолжээ.

Л.Баяр