Арванхоёрдугаар сар гарч гацуур модод, гэрлийн чимэглэлүүд нийслэл хотод хэсэгхэн ч гэсэн баярын уур амьсгалыг авч иржээ. Гадаа хүйтэн ч алхаж яваа хүмүүсийн дотор шинэ жилийн баярын догдлол дүүрэн байгаа нь ажиглагдахаар. Ийн бодож алхсаар бид зорьсон газраа ирлээ. Хэдхэн хоногийн өмнө, эко модоор үйлдвэрлэсэн гацуур модны чимэглэлийн тухай фейсбүүкээс харсан минь намайг ийш авч ирэхэд хүргэв. Биднийг хоёр найз угтсан нь Б.Даваасүрэн, Б.Далай-Эрдэнэ нар.
Тэд хамтран гацуур модны чимэглэл, шинэ жилийн гоёлын камин зуух болон шинэ жилийн холбогдолтой ширээний чимэглэл, лааны суурийг эко модоор үйлдвэрлэж байгаа юм. Үүнээс гадна тэдний хийсэн чимэглэлүүд Монгол үндэсний шинжийг харуулсан танин мэдэхүйн шинжтэй гэдгээрээ онцлог. Ингээд тэдэнтэй хэсэг хөөрөлдсөнөө хүргэе.
-Б.Даваасүрэн: Монгол үндэсний онцлогийг харуулсан гацуур модны тоглоомыг хэрэглэгчдэдээ санал болгож байна-
-Арванхоёрдугаар сар гарахтай зэрэгцэж шинэ жилийн уур амьсгал орж эхэлжээ. Энэ үед шинэ жилийн уур амьсгал оруулах өвөрмөц бас өөрийн гэсэн онцлогтой чимэглэл, гоёлуудыг үйлдвэрлэж байгаа нь биднийг ийш хөтөллөө. Та бүхэн өөрсдийн хийж байгаа бүтээлүүдээ манай сайтын уншигчдад танилцуулаач?
-Уншигчдадаа энэ өдрийн мэнд хүргэе. Шинэ жилийн баяр дөхөөд ирэхээр хүн бүрийн сэтгэлд догдлол, баяр баясал дүүрдэг шүү дээ. Бидний ажигласнаар хил гаалийн асуудлаас шалтгаалаад энэ жил шинэ жилийн тоглоом, чимэглэл хомс байсан. Ингээд найзтайгаа хамтраад хуванцар тоглоомын оронд удаан ашиглах, бас өөрийн гэсэн онцлогтой эко модон чимэглэлийг хийхээр шийдсэн маань энэ. Одоогоор бид 13 төрлийн чимэглэлийг гаргаад байгаа. Уламжлалт Христмасын баярын Санта, буга зэрэг байхаас гадна Монгол үндэсний онцлогийг шингээхийг зорьж байгаа.
Онцлох загваруудаас танилцуулбал, Хаадын тамга багц маань Чингис хаан болон түүний дөрвөн хүүгийн тамгаар хийсэн гацуур модны өлгөдөг чимэглэл, улаан номд орсон ховор ан амьтадын багц бий. Үүнээс гадна Монгол ахуйг харуулсан алтайн ятга, монгол гэрийг харуулсан багц, Нийслэл багц буюу Улаанбаатар хотын онцлох барилга байгууламжийг харуулсан багцуудаа танилцуулж байна.
Үүнээс гадна, компанийн лого, хүүхдийнхээ анхны шинэ жил, нэр болон ширээний дугаар зэргийг бичиж хийх боломжтой. Жишээлбэл, лааны суурь, ширээний чимэглэл, гацуурын тоглоом зэрэг төрлүүд бий. Найз нөхөд, ээж аавдаа болон монитадаа өгөхөд тохиромжтой, мөн лааны суурь, ширээний гацуурыг шинэ жилээр албан байгууллагууд шилдэг ажилтны өргөмжлөл болгон ашиглах боломжтой.
-Модон тоглоомууд эко гэдгээрээ онцлог гэж хэлсэн шүү дээ. Үүнийг тайлбарлавал?
-Бид үйлдвэрийн гурван миллиметрийн өргөнтэй модон хавтанг лазераар зүсээд өнгө будгаа гаргаж, саа гоёл чимэглэлээ мэргэжлийн зураачид нэг бүрчлэн гараар будаж хийдэг. Тиймээс хуванцар тоглоомыг бодвол хагарч гэмтэхгүй, эдэлгээ удаан бөгөөд хүүхэд амандаа хийсэн ч аюулгүй гэсэн үг.
-Б.Далай-Эрдэнэ: Манайх гацуур модны тоглоомоос гадна гоёл чимэглэлийн камин зуухны худалдаа, түрээсийн үйлчилгээг санал болгож байна-
-Таны хувьд мэргэжлийнхээ онцлогийг ашиглаад найзтайгаа хамтраад ажиллаж байгаа гэсэн. Хэдэн оноос эхэлж зураач мэргэжлээр ажиллаж байна вэ?
-Би 2014 оноос хойш зураач мэргэжлээр ажиллаж байна. Өнгөрсөн хугацаанд киноны зураг болон бие даасан бүтээлүүддээ цаг гаргаж ажилладаг байлаа. Харин энэ удаад Б.Даваасүрэн найзтайгаа хамтраад шинэ жилийн уур амьсгал бүрдүүлэх чимэглэл, тоглоомууд дээр ажиллаж байна. Найз маань хэв, загвараа гаргаж зүсээд бэлэн болгож, харин би түүн дээр нь өнгө будгаар зурж, чимэглэх ажлыг гүйцэтгэдэг.
-Дан ганц гацуур модны чимэглэлээс гадна шинэ жилийн камин зуух харагдаж байна. Үүнийг бас өөрсдөө хийж байгаа юу? Энэ талаар танилцуулж өгөөч?
-Тиймээ. Бид өөрсдийн хийсэн камин зуухыг хэрэглэгчдэд санал болгож байгаа. Энэ нь тайзны зориулалтаар хийсэн учраас маш хөнгөн, олон жил хэрэглэж болохоос гадна, дахин сэргээн засварлаж болно. Одоогоор хоёр загварын камин зуух гарсан байгаа. Цаашид захиалагчдын хүссэн хэмжээ, загвар, өнгөтэйгөөр хийж өгөх боломжтой.
-Үнийн хувьд ямар үнэтэй худалдаалж байгаа вэ?
-Камин зуухны хувьд 200-800 мянган төгрөгийн үнэтэй. Хэмжээ загвараасаа шалтгаалаад үнэ нь өөр өөрөөр гарна. Түүнээс гадна бид түрээсийн үйлчилгээг санал болгож байгаа. Албан байгууллагууд нэг өдөр шинэ жилээ хийхийн тулд заавал худалдаж авахгүйгээр нэг өдөр түрээслээд ашиглах боломжтой.
-Ярилцсанд баярлалаа. Та бүхэнд ажлын амжилт хүсье.
-Баярлалаа. Монгол үндэсний уламжлал шингэж, монгол урчуудын гараар бүтсэн шинэ жилийн чимэглэл, тоглоомуудаа сонгож, биднийг дэмжээрэй.
Хувь хүн, албан байгууллагын хэрэглэгч та бүхэн шинэ жилийн чимэглэл тоглоом захиалахыг хүсвэл “Өв дизайн” ХХК-ийн фейсбүүк хаяг болон 88058403 дугаарт хандан хүргүүлж авах боломжтой.
Т.Мөнхжаргал
