Уншигч та бүхэнд энэ долоо хоногт болж өнгөрсөн томоохон мэдээллүүдийг түүвэрлэн хүргэж байна. Энэ долоо хоногт Катарт гал шиг тоглолтууд үргэлжлэхийн зэрэгцээ Дархан-Уул аймагт гал түймэр гарав.  Мөн Сэлбэ голын төсөлтэй холбоотой 3.1 тэрбум төгрөгийн санхүүжилтийг эргүүлэн татлаа. 

Ерөнхийлөгч У.Хүрэлсүх Японы улсад айлчиллаа

Монгол Улсын төрийн тэргүүний түвшинд 2010 оноос хойш 12 жилийн дараа Япон Улсад хэрэгжиж буй төрийн айлчлал нь Монгол, Японы харилцааг гүнзгийрүүлэх, ард түмний найрамдал, нөхөрлөлийг бэхжүүлэх, хоёр улсын хагас зуун жилийн хамтын ажиллагааг дүгнэж, ирэх 50 жилд хөгжүүлэх хэтийн төлөв, чиглэлийг тодорхойлоход ач холбогдолтой болно.

Япон улсын 13 иргэнийг төрийн одон, медалиар шагналаа

Монгол Улсын Ерөнхийлөгч Ухнаагийн Хүрэлсүх Монгол Улс, Япон Улсын хооронд дипломат харилцаа тогтоосны 50 жилийн ойг тохиолдуулан хоёр улсын харилцаа, хамтын ажиллагаанд үнэтэй хувь нэмэр оруулсан Япон Улсын иргэдийг төрийн одон, медалиар шагнах тухай зарлиг гаргасан.

Зарлигийн дагуу шагналыг гардуулах ёслол Монгол Улсын Ерөнхийлөгч Ухнаагийн Хүрэлсүхийн Япон Улсын Засгийн газрын урилгаар тус улсад хийж буй төрийн айлчлалын үеэр боллоо. 

Алтан цомын төлөөх тэмцээний хоёрдугаар шат эхэллээ

Монголын Үндэсний бөхийн холбоо, SPS телевиз хамтран зохион байгуулж буй "Үндэсний Алтан цом" тэмцээний нэгдүгээр шат өнгөрсөн сард амжилттай зохион байгуулдагдсан билээ. Хоёрдугаар шатанд 16 баг үлдсэн бөгөөд тэмцээн арванхоёрдугаар сарын 1-нд эхэлсэн билээ. Ийнхүү уншигч та бүхэнд багуудын оноолтыг танилцуулж байна.  

1. Архангай аймгийн баг - Ховд аймгийн баг
2. Өмнөговь аймгийн баг - Баянхонгор аймгийн баг
3. Увс аймгийн баг - Баянгол дүүргийн баг
4. Баян-Өлгий аймгийн баг - Дундговь аймгийн баг
5. Баянзүрх аймгийн баг - Завхан аймгийн баг 
6. Өвөрхангай аймгийн баг - Улаанбаатар хотын баг
7. Төв аймгийн баг - Сүхбаатар дүүргийн баг
8. Багануур дүүргийн баг - Булган аймгийн багтай тус тус өрсөлдөхөөр болсон билээ. 

Сэлбэ голын төсөлтэй холбоотой 3.1 тэрбум төгрөгийн санхүүжилтийг эргүүлэн татлаа

Сэлбэ гол төслийн нэгжид зарцуулахаар төлөвлөсөн байсан 3.1 тэрбум төгрөгийг дэмжихгүй гэсэн шийдвэрийг НИТХ дахь МАН-ын бүлэг гаргасан. Тиймээс Нийслэлийн Засаг дарга бөгөөд Улаанбаатар хотын Захирагч төсвийн төслөөс саналаа эргүүлэн татаж байна. Үүнээс гадна Бодлогын судалгаа шинжилгээний газрын төсвийг 1.9 тэрбум төгрөгөөр бууруулах шийдвэр гарсан учир саналаа татаж төсвийг нь бууруулахаар боллоо хэмээн НЗД-ын хэвлэлийн төлөөлөгч Н.Сугар мэдээллэв. 

Дархан-Уул аймгийн “Тэс Петролиум” ХХК-д гарсан гал түймэр гарлаа

Дархан-Уул аймгийн Дархан сумын 3-р баг   гал түймэр гарлаа гэсэн дуудлага арванхоёрдугаар сарын 01-ний 09:21 цагт Онцгой байдлын газарт ирсэн.

Алба хаагчдыг очиход 2000 тоннын багтаамжтай АИ-92 шатахууны нөөцийн сав шатаж байсныг унтраахаар ажиллаж байна.

 Дуудлагын дагуу Гал түймэр унтраах, аврах 22, 54, Сэлэнгэ аймгийн Онцгой байдлын газрын Гал түймэр унтраах, аврах 19, 61 дүгээр ангийн алба хаагчид үүрэг гүйцэтгэв. 

Ж.Ганбат: "Эрдэнэс Тавантолгой" ХК-ийн 152 сая ам.долларын өрийг барагдуулж, экспортыг хоёр дахин нэмэгдүүлж ажиллалаа

"Эрдэнэс Тавантолгой" ХК-ийн онцгой бүрэн эрхт төлөөлөгч Ж.Ганбат мэдээлэл өглөө. Тэрбээр "Засгийн газрын гадаад орлогыг нэмэгдүүлэх тухай 362 дугаар тогтоол батлагдсанаас хойш “Эрдэнэс Тавантолгой” ХК 341.5 сая ам:долларын үнэ бүхий 3.7 сая тонн нүүрс борлуулсан. Миний бие Бүрэн эрхт төлөөлөгчөөр томилогдоод 35 хоног дээрээ ажиллаж байна.

Аравдугаар сарын 5-ны байдлаар буюу Засгийн газрын 362 дугаар тогтоол батлагдах өдөр “Эрдэнэс Тавантолгой” ХК-ийн өр 603 сая ам.долларын өр байлаа. Үүнээс 152 сая ам.долларын 35 хоногийн хугацаанд өрийг барагдууллаа. Үлдэгдэл нь 451 сая ам.доллар байна" гэв.

Т.Аюурсайхан гишүүний нэрлэсэн Монголбанкны тэргүүн дэд ерөнхийлөгч хэн бэ?

Өнөөдрийн УИХ-ын чуулганы хуралдаанаар Хөдөлмөр нийгмийн хамгааллын сайд Т.Аюурсайхан Монголбанкны эрх хүлээн авагч нийгмийн даатгалын санг эрсдэлд оруулсан тухай мэдээлсэн.

Тэрбээр  "Нийгмийн даатгалын сантай холбоотой Монголбанкны асуудал байна. 50 мянган ажил олгогч 460 мянган тэтгэвэр авагчдын мөнгө бий. Энэ санг эрсдэлд оруулсан хүмүүст хариуцлага тооцож, Монголбанкны эрх хүлээн авагчийг шалгах ёстой гэж бодож байна. Монголбанк арилжааны банкийг дампууруулдаг, өмч хөрөнгийг нь дээрэмддэг байдал үргэлжлээд явж байна. Тухайлбал, Сэлхийн зусланд "Замбуулин виллаж" гээд хотхон байгаа. Энэ амины орон сууц, хаусыг Монголбанк удирдлагуудынхаа эрх мэдэлд хураагаад авчихсан. Тэргүүн дэд ерөнхийлөгч нь тэнд орчихсон, амьдарч байна гэж иргэд мэдээлж байна" гэсэн юм.  

Тэгвэл түүний яриандаа дурдсан Монголбанкны тэргүүн дэд ерөнхийлөгч хэн бэ? 

Юуны өмнө уншигч та бүхэнд Монголбанкны тэргүүн дэд ерөнхийлөгчөөр ажиллаж байсан болон одоо ажиллаж буй хүмүүсийг танилцуулъя. 

• Г.Дөлгөөн 2020 оноос хойш ажиллаж буй 
• О.Эрдэмбилэг 2016-2019 он хүртэл 
• Б.Жавхлан 2010-2016 он хүртэл ажиллаж байжээ. 

Хөлбөмбөгийн ДАШТ-ий эргэн тойронд 

Катар улсад зохион байгуулагдаж буй хөлбөмбөгийн ДАШТ-ий хэсгийн тоглолтууд өнгөрөгч шөнө дуусаж, шөвгийн 16-д Нидерланд, Сенегал, Англи, АНУ, Аргентин, Австрали, Хорват, Марокко, Япон, Испани, Франц, Польш, Бразил, Солонгос, Португал, Швейцарын шигшээ багууд шалгаран үлдлээ.