Засгийн газрын өчигдрийн (2023.09.01) ээлжит бус хуралдаанаар Цагдаагийн ерөнхий газрын дарга, Дотоодын цэргийн командлагч, генерал Ж.Болдыг албан тушаалаас нь чөлөөлсөн. Энэ нь хүчний байгууллагуудын халаа сэлгээний эхлэл байх бололтой. ҮАБЗ-ийн хэмжээнд хүчний байгууллагуудын удирдлагуудын асуудал яригдсан бөгөөд Дотоодын цэргийн командлагчаар сэлгээг эхлүүлж байгаа юм байна.
Уг нь ажлаа өгөөд ганцхан хонож байгаа Цагдаагийн ерөнхий газрын дарга, Дотоодын цэргийн командлагч Ж.Болдын хувьд Ерөнхийлөгчийн ч, Ерөнхий сайдын ч, Хууль зүй, дотоод хэргийн сайдын ч дэмжлэгтэй байсан нэгэн. Хэнтийн цагдаагийн газрын дарга хурандаа Ж.Болд Цагдаагийн Ерөнхий газрын дэд даргаар томилогдох үед түүний дараагийн зогсоол нь Цагдаагийн ерөнхий газрын дарга, цол нь генерал байх нь ээ гэдэг нь тодорхой байсан.
Учир нь дээр хэлсэнчлэн тэрбээр төрийн өндөр албан тушаалтнуудын “Хэнтий фракц”-ын “лифт”-нд нэгэнт суусан байв. Цагдаагийн даргаар томилогдож, генерал цолоо авсных нь дараанаас түүнийг Элчин сайдаар томилогдох тухай яригдаж эхэлсэн бөгөөд энэ нь оргүй байгаагүй юм. БНСУ-д суух Онц бөгөөд бүрэн Эрхэт Элчин сайдаар томилогдоод байгаа Б.Энхбатын агреманыг суугаа орон өнөөдрийг хүртэл өгөөгүй байгаагаас дараагийн Элчин сайд нь ЦЕГ-ын дарга Ж.Болдыг байж магадгүй гэсэн яриа ч улс төрийн хүрээнд нэгэнт сонсогдоод эхэлсэн байв. Гэхдээ Засгийн газрын ээлжит бус хурлаар албан тушаалаасаа чөлөөлөгдсөнөөр Ж.Болдын Элчин сайд болох хүсэл нь биелээгүй мөрөөдлийнх нь нэг нь болох бололтой.
Одоо харин Цагдаагийн ерөнхий газрын дараагийн дарга, Дотоодын цэргийн командлагч хэн байх бол гэдэг олны анхаарлын төвд байна. Дараагийн цагдаагийн газрын даргын нэрс Хууль зүйн сайдын халаасанд буй гэх бөгөөд энэ нь Цагдаагийн Ерөнхий газрын дэд бөгөөд Нийслэлийн цагдаагийн удирдах газрын дарга, хурандаа О.Ганбат, Эрүүгийн цагдаагийн газрын дарга хурандаа Т.Сүхболд нар.
Т.Сүхболд бол Хууль зүйн сайд Х.Нямбаатарын маш ойрын, цагдаагийн байгууллага дахь түших хүн нь гэгддэг. Эрүүгийн цагдаагийн газрын дарга Т.Сүхболд өмнө нь Хэнтий аймгийн эрүүгийн цагдаагийн хэлтэс, Эрүүгийн цагдаагийн газрын Эдийн засгийн гэмт хэрэгтэй тэмцэх газрын Мөнгө угаахтай тэмцэх хэлтсийн даргаар ажиллаж байсан. Энэ үедээ одоогийн Цагдаагийн ерөнхий газрын дэд дарга Ц.Ням-Очиртой нэг “баг” болон эдийн засгийн олон гэмт хэрэг, тухайлбал нүүрсний гэх хэргийг хав дарж байсан хэмээн хэвлэл мэдээллийн хэрэгслүүдээр гарч байсан нэгэн. Одоо бол Хууль зүйн сайдын дэмжлэгээр Цагдаагийн ерөнхий газрын дарга болох хамгийн эхний нэр дэвшигчээр нэрлэгдээд байж байна.
Харин дараагийн нэр дэвшигч, Цагдаагийн Ерөнхий газрын дэд бөгөөд Нийслэлийн цагдаагийн удирдах газрын дарга О.Ганбат нь Өвөрхангайн фракц буюу Ерөнхийлөгчийн тамгын газрын дарга Я.Содбаатар, нийслэлийн Засаг дарга Д.Сумъяабазар нарын ойрын хүн. Өмнө нь Тээврийн цагдаагийн газар, Хэнтий, Өвөрхангай аймгийн цагдаагийн газрын даргаар ажиллаж байсан түүнийг Өвөрхангайнхан Цагдаагийн ерөнхий газрын даргад зүтгүүлж байна.
Ийм хоёр нэр дэвшигчийн нэрс Хууль зүй, дотоод хэргийн сайдын халаасанд бэлэн явна.
А.Болдбаатар
