СТА, дуучин А.Хосбаяр “Богд хээрийн дуулал” хэмээх бие даасан гурав дахь тоглолтоороо үзэгч түмэнтэйгээ учран золголоо. Тэрбээр морины тухай олон сайхан дуугаараа нэрд гарч яваа дуучин юм. Монголын ард түмэн түүний "Гүйгүүл морь", "Адуутай намар" ,"Бүжин бор" зэрэг олон сайхан дуунуудыг шимтэн сонсдог билээ. Ийнхүү уншигч та бүхэнд “Богд хээрийн дуулал” тоглолтын үеэрх сурвалжилгыг хүргэж байна.
СТА А.Хосбаяр: Үзэгч түмэн маань халуун алга ташилтаар угтаж, хамтдаа дуулж байгаа тэр мөч уран бүтээлчдийн аз жаргал
“Бие даасан гурав дахь тоглолт маань маш сайхан болж байна. Үзэгч түмэнтэйгээ 18 дуугаараа учран золгож байна. Нэг ч дуу ам барилгүй дуулж байна. Сүүлийн үед ам барина гэх асуудал их яригдах болсон шүү дээ. Тоглолтынхоо нэрийг “Богд хээрийн дуулал хэмээн зорьж нэрлэсэн. Миний уран бүтээлүүд доторх томоохон байр суурийг эзлэх уран бүтээл учраас энэ дууныхаа нэрээр нэрлэсэн. Жингүйднэ хэмээн ярьдаг шүү дээ орчлонгоос тасарч байгаа юм шиг санагдаж байна.
Үзэгч түмэн маань халуун алга ташилтаар угтаж, хамтдаа дуулж байгаа тэр мөч уран бүтээлчдийн аз жаргал байдаг. Энэ аз жаргалыг яг одоо мэдэрч байна.
Цаашид уран бүтээлээ тасралтгүй хийх төлөвлөгөөтэй байна. Миний хувьд тоо гэхээсээ илүү чанарыг эрхэмлэдэг учир миний уран бүтээлүүд удаж гардаг байх. Чанартай уран бүтээлийн төлөө зүтгэнэ дээ” хэмээн тоглолтынхоо үеэр сэтгэгдлээ хуваалцлаа.
Тоглолтод уран бүтээлээ өргөн барьсан уран бүтээлчид тоглолтын талаар болон СТА, дуучин А.Хосбаярт хандан сэтгэлийн үгээ дамжууллаа.
Хөсөгтөн хамтлагийн ятгачин Ч.Амарбаясгалан: Дуучин А.Хосбаяр бол дуугаа урлаж дуулдаг дуучин
Тэрбээр “А.Хосбаяр дуучныг уран бүтээлч хүнийх нь хувьд хүндэлж явдаг. Манай хамтлаг А.Хосбаярынхаа тоглолтод хоёр уран бүтээлээ өргөн барилаа. Хүн болгоны хамгийн сайн мэдэх Адуутай намар дууг хамтран хөгжимдсөндөө маш их баяртай байна. Манай хамтлаг цоо шинэхэн уран бүтээл болох “Би Монгол хүн” дуугаа өнөөдөр анх удаа үзэгчиддээ сонордууллаа. А.Хосбаяр бол дуугаа урлаж дуулдаг дуучин гэж боддог” гэв.
СТА Б.Буянжаргал: Бид ганзага дөрөө нийлдэг уран бүтээлчид гэж боддог
Тэрбээр “Төв сайхан нутгийн минь ах А.Хосбаярын гурав дахь тоглолт болох “Богд хээрийн дуулал” тоглолт сайхан болж байгаад баяртай байна. Бид хоёр оюутан ахуй цагаасаа бие биенээ мэднэ. 2013 онд миний бие хоёр дахь бие даасан тоглолтоо хийсний дараа бид хамтарсан аялан тоглолт хийж байлаа. Мөн гурван аймгийн 50 орчим сумд аялан тоглолт хийж байсан. Тэр цагаас хойш арван жилийн хугацаа өнгөрсөн байна. Нийт 80 гаруй тоглолтод хамт оролцжээ. А.Хосбаяр ах маань морины тухай уран бүтээлүүдээ өргөн барьдаг. Тийм учраас энэхүү тоглолтод “Аавын борлог морьд”, “Миний монголын намар” хэмээн уран бүтээлүүдээрээ ая дуугаа өргөн барина. Бид хоёр уран бүтээлийн ганзага дөрөө нийлдэг уран бүтээлчид гэж боддог” гэлээ.
“Богд хээрийн дуулал” дууны аяыг СТА, Ая зохиогч Б.Пүрэвсүрэн зохиосон юм.
СТА, Ая зохиогч Б.Пүрэвсүрэн: “Богд хээрийн дуулал” дуу хийморь шингэсэн сайхан уран бүтээл учир маш хурдан бүтсэн
Тэрбээр “Богд хээрийн дуулал” тоглолт маш сайхан өргөн дэлгэр, халуун тоглолт болж байна. Уран бүтээлчид бие даасан тоглолтоо хийхдээ хэсэг хугацаанд бэлдэж байж тоглолтуудынхаа ард гардаг. А.Хосбаярын маань энэ удаагийн тоглолт маш сайхан онцлогтой болж байгаа. Тухайлбал, Монгол төрийн наадмын 99, 100, 101 жилийн ойд түрүүлсэн Богд хээр хэмээх хурдан буянд зориулж хийсэн уран бүтээл бий. Энэ уран бүтээлийнхээ нэрээр гурав дахь бие даасан тоглолтоо нэрлэж, тоглолтоо хийж байгаа юм. “Богд хээргийн дуулал” хэмээх дуу УГЗ, Төрийн шагналт Гүрбазар ахын шүлэг. Дууны шүлэг над дээр ирээд л аялгуу нь бүтсэн. Хийморь шингэсэн сайхан уран бүтээл учир маш хурдан бүтсэн гэж боддог.
Энэхүү тоглолт 100 хувийн амьд тоглолт болж байгаагаараа мөн онцлог. Цаашид олон олон уран бүтээлээ Монгол түмэндээ хүргэж, дуун суваргуудыг олон бүтээж, нэр цуугаа мандуулаасай хэмээн ерөөл тавья.
Энэ тоглолтыг үзэхээр сум сумаас олон хүмүүс ирсэн гэж сонслоо. Төв аймгийн дуучнаа дэмжиж, зохион байгуулалтад орж ирсэнд баяртай байна” хэмээсэн билээ.
"Богд хээрийн дуулал" тоглолтын ерөнхий ивээн тэтгэгчээр Монгол групп ажиллав.
Монгол Улсын Манлай уяач Б.Нямжав: Богд хээрийн дуулал дуугаараа тоглолтоо нэрлэж, хүндэтгэл үзүүлсэнд баяртай байна
Тэрбээр “Тоглолт маш сайхан болж өндөрлөлөө. Юун түрүүнд тоглолтондоо урьсан А.Хосбаяр дүүдээ талархал илэрхийлье. А.Хосбаяр бид хоёр 2007 оноос танилцаж, нөхөрлөсөн. 16 жилийн хугацаанд ах дүү, найз нөхдийн харилцаа үргэлжилж байна.
Ардын хувьсгалын 100 жилийн хугацаанд хурдаараа мөнхөрсөн адуу дуунд мөнхөрсөнд маш их баяртай байна.
Энэхүү дууг бүтээхэд оролцсон Яруу найрагч Ш.Гүрбазар болон ая зохиогч Пүрэвсүрэн, дуучин А.Хосбаяр нартаа маш их талархаж байна.
Богд хээр азаргыг түрүүлэх болгонд миний нэр, нутгийн минь нэртэй байнга хамт дурдагдаж явдаг. Нутгийнхаа шүтээнээр Богд хээр азаргаа нэрлэсэн нь их оножээ.
Богд хээрийн дуулал дуугаараа тоглолтоо нэрлэж, хүндэтгэл үзүүлсэнд баяртай байна. Энэ дууны шүлэгэнд нутгийн шүтээн уулыг, Туул голтой нь нүдэнд харагдтал сайхан шингээж, түүнийг нь А.Хосбаяр дүү маань сэтгэлд хоногштол сайхан дуулсан байдаг. Дуучин дүү минь түмний сэтгэлд хүртэл сайхан дуулж өгсөнд маш их баярлаж байна” гэсэн юм.
Д.Батчулуун
