“Улаанбаатар Элит” олон улсын дунд сургуулийн сурагчид “Elite International MUN” буюу НҮБ-ын загвар хурлыг найм дахь удаагаа зохион байгуулж байна. Аравдугаар сарын 25-27-ны өдрүүдэд болох тус арга хэмжээ англи, монгол, орос, хятад гэсэн дөрвөн хэл дээр болох юм.
Загвар хуралдаан жил бүхэн өөр, өөр сэдвийн хүрээнд зохион байгуулагддаг. Сурагчид өгөгдсөн сэдвийн хүрээнд мэдлэг, мэдээллээ хуваалцаж, санал, шүүмж боловсруулдаг нь энэхүү арга хэмжээний бас нэг онцлог юм.
Энэ удаагийн хуралдаан “Улс орнуудын эдийн засгийн ялгаатай байдал” сэдвийн хүрээнд болж буй.
Хүүхдүүд дайн дажин, цар тахлын улмаас олон улсын эдийн засагт гарч буй өөрчлөлтийн талаар хэлэлцэх бөгөөд нэг дэлхийд, нэг цаг хугацаанд аж төрж буй улс орнуудын эдийн засгийн нөхцөл байдал харилцан адилгүй байгаагийн учрыг эрэх аж.
НҮБ-ын үйл ажиллагааг сурагчдад таниулж, олон улсын мэдлэгийг нь өргөжүүлэх зорилготой тус арга хэмжээнд улсын болон хувийн сургуулийн сурагчид хамрагддаг гэдгээрээ онцлог. Хуралдаанд нийслэлийн болон орон нутгийн 50 орчим сургуулийн 400 гаруй хүүхэд жил бүхэн бүртгүүлдэг байна. Тэдгээрээс шалгаруулж, 160 орчим нь загвар хуралдаанд оролцдог. Энэ удаагийн хуралдаанд Улаанбаатар хотоос гадна Орхон, Дархан-Уул зэрэг аймгийн 30 гаруй сурагч оролцож байна.
Найм дахь удаагаа болж буй “Elite International MUN” загвар хурлын талаар оролцогч, зохион байгуулагч сурагчдын сэтгэгдлийг сонслоо.
Elite International MUN-н зохион байгуулагч Б.Номин-Эрдэнэ
Энэ жил бид улс орнуудын эдийн засгийн өөр өөр байдлын талаар хэлэлцэхээр “Олон улсын эдийн засгийн ялгаатай байдал” гэх сэдвийг сонгосон. Elite International MUN нь бусад сургуулийн загварчилсан хурлаас хэд хэдэн онцлогтой. Нэгдүгээрт, манайх энэ хурлыг зохион байгуулж буй анхдагчдын нэг. Мөн хамгийн анхны дөрвөн хэл дээр зохион байгуулж байгаа НҮБ-ын загвар хурал юм. Бид 2018 оноос хойш загвар хурлаа тасралтгүй зохион байгуулсан. Цар тахлын үед ч халдвар, хамгааллын дэглэмээ баримтлаад хурлаа хийж байсан. Хүүхдүүд өөр, өөр улсыг төлөөлж тэмцээнд оролцдог. Улмаар НҮБ-ын хороонуудад хуваагдаж, судалсан сэдвийн хүрээнд мэтгэлцдэг.
Elite International MUN-н Нарийн бичгийн дарга А.Алунгоо
Энэ жил би Elite International MUN-н нарийн бичгийн даргаар ажиллаж байна. Зохион байгуулах ажилд гурав дахь жилдээ оролцож байна. Энэ жилийн хуралдаан маш сонирхолтой сэдвээр болж байгаа. Бид улс орнуудын эдийн засагтай холбоотой сэдэв сонгоод, хурлаа хийнэ. Дэлхийн хэд хэдэн улсад дайн болж, олон улс эдийн засгийн уналтад орж байгаа энэ үед асар өргөн хүрээтэй тус сэдвийн талаар хэлэлцэж байгаа нь маш сонирхолтой санагдаж байна. НҮБ-ын загвар хуралдаан нь хүүхдүүдийг олон нийттэй харилцах, бусдад өөрийгөө илэрхийлэх чадварт суралцуулдаг. Түүнчлэн ирээдүйд НҮБ-д ажиллалаа гэхэд ямар үүрэгтэй ажиллах ойлголт өгдөг. Мөн сургуулиас гадуурх үйл ажиллагаа учир төгсөөд гаднын сургуульд элсэхэд түлхэц болно.
Elite International MUN-н оролцогч Б.Бат-Идэр
Анх удаа Elite International MUN-д оролцож байна. Гадаад улс орнуудын эдийн засгийн нөхцөл байдлын талаар судалж, танилцана гэхээр их сонирхолтой санагдаж байна. Өнгөрсөн жилийн сэдэв дайны тухай байсан. Хурал гурван өдөр болно. Хүүхдүүд НҮБ-ын зургаан том хороонд хуваагдаад, тухайн улсаа төлөөлж мэтгэлцэнэ. Би ирээдүйд инженер болно гэж боддог. Elite International MUN-д оролцож байгаа нь зорилгодоо хүрэхэд дэмжлэг үзүүлнэ гэж бодож байна. Учир нь хуралдаанд оролцсоны дараа бидэнд сертификат олгодог. Энэ нь сургуулиа төгсөөд, их сургуульд элсэхэд чухал түлхэц болно.
Elite International MUN-н оролцогч Б.Хос-Эрдэнэ
Би Эрдэнэтээс ирсэн. Анх удаа Elite International MUN-д оролцож байна. Эхэндээ сандраад яахаа мэдэхгүй байсан. Гэхдээ найзуудтайгаа ирсэн болохоор сайхан байна. Манай сургуулиас найман хүүхэд ирсэн. Хоёр жилийн өмнө манай ангийн хүүхдүүд Elite International MUN-д оролцож байсан. Тиймээс энэ жилийн хуралд оролцох хүсэлт өгсөн. Эхэндээ өөрийгөө тэнцэнэ гэж бодоогүй. Хуралд оролцох боломжтой гэх хариу аваад их баярласан. Энэ сургалтад сууснаар бусадтай нээлттэй харилцаж, өөрийнхөө үзэл бодлыг зөв, цэгцтэй илэрхийлж сурна гэж бодож байна. Түүнчлэн дэлхийн улс орнуудын талаар мэдээлэлтэй болно гэж бодохоор сонирхолтой санагдаж байгаа. Мөн хүүхдүүдтэй танилцаад, шинэ хүрээлэлтэй болно.
“Elite International MUN”-ны нээлтэд Дэлхийн эрүүл мэндийн байгууллагын Монгол дахь Суурин төлөөлөгч Др.Сокорро Эскаланте оролцож үг хэлсэн юм. Түүнээс тус загвар хуралдааны талаарх байр суурийг нь тодрууллаа.
Дэлхийн эрүүл мэндийн байгууллагын Монгол дахь Суурин төлөөлөгч Др.Сокорро Эскаланте
НҮБ-ын загварчилсан хурлыг зохион байгуулж байгаа “Улаанбаатар Элит” олон улсын дунд сургуулийн хамт олонд баяр хүргэе. Энэхүү үйл ажиллагаа нь ирээдүйн удирдагчдыг бэлтгэх томоохон алхам юм. Бид дэлхий даяар тулгамдаж буй асуудлууд болон тэгш бус байдал, хүний эрх, шударга ёсны талаар суралцаж байна. НҮБ-ын загвар хурал бол залуучуудыг ирээдүйн манлайлагч болгох маш чухал талбар юм. Өнөөдрийн уулзалтаар би НҮБ-ын тогтолцоо, дэлхийн энх тайван, тэгш байдал, төлөөллийн асуудлын талаар мэдээлэл хүргэлээ.
Ахлах ангийн сурагчид өөрсдөө НҮБ-ын загвар хурлыг зохион байгуулж, түүнд нь хүүхдүүд ач холбогдол өгч, олон улсын хуралдааны дэгийн дагуу ажиллах нь олон талын ач холбогдолтой. Тухайлбал, хүүхдүүд багаар ажиллах, шинийг сэтгэх, аливааг судлах эрмэлзлэлтэй болох бөгөөд илтгэх, мэтгэлцэх, дипломат ёс болон албан бичиг боловсруулах бодит чадварт суралцдаг байна. Мөн НҮБ-н ерөнхий үйл ажиллагаа болон хурлын дараалал, дэг журамтай танилцаад зогсохгүй олон улсын харилцаа, эдийн засаг, хууль зүй, шинжлэх ухаан, эрүүл мэнд, сэтгүүл зүй, технологийн дэвшил, соёл шинжлэл зэрэг сэдвийн хүрээнд гүнзгийрүүлсэн мэдлэгтэй болдог аж.
