Баянзүрх дүүргийн 26 дугаар хороо, бидний мэдэхээр Дүнжингарав худалдааны төвийн урд зам дээр ноцтой осол гарсны улмаас 60 тонн газ тээвэрлэж явсан автомашин дэлбэрч, онцгой байдлын албаны гурван аврагч амь үрэгдээд буй. Дуудлага урд шөнө 01:07 цагт НОБГ-т ирсэн байна. Уг эмгэнэлт үйл явдлын гол буруутанг хүмүүс эрэн хайж буй цаг хугацаанд энэ нийтлэлийг бичиж байна. 

Газ тээвэрлэж явсан автомашины жолооч эсэн мэнд буй. Тэрбээр "Хажуугаас машин гулгаж ирээд мөргөсөн. Үсэрч буугаад амьд үлдлээ. Мөргөсөн машины жолооч гарсан эсэхийг мэдэхгүй байна" хэмээсэн. Түүний хувьд 50 орчим насны даруухан эр харагдав. Гал авалцаж, дэлбэрэлт болох үед тэр ойрхон байх барилгад орж, хүмүүст болсон үйл явдлыг ярихдаа ихэд сандарсан байв. Санаагаар нь болдог бол "гарч гүйгээд, галыг унтраахыг хүсэх" шиг...

Иргэд олон нийтийн сүлжээнд түүнийг буруутгахаасаа илүүтэйгээр "Амьд гарсан нь зол", "Ааваас минь ялгаа юу байх вэ? амьд байгаад нь баярлалаа" гэх зэргээр эерэг сэтгэгдэл үлдээж байна. 

Гагцхүү тэдний эмээж буй зүйл нь хэн нэгэн нь бурууг түүн рүү бухах вий гэх бодол. Буруутанг эцэслэн тогтоогоогүй байгаа тул ажиглаж суух нь ээлтэй биз. Үнэн хэрэгтээ жолоо мушгиж явсан тэдний осолд гаргах болсон шалтгаан нь гулгаа гэцгээж байна. Хяналтын камерын дүрс бичлэгээс тийм л дүгнэлт хийсэн бололтой. 

Нээрээ л үйл явдлын ард хэн нэгэн нь хэвлэлийнхний өмнө гарч ирээд хөөрхий тэр эрийг, магадгүй гулгаж ирээд мөргөсөн өөр нэг жолоочийг буруугийн өмнө цовдлох вий. Хэрэв тэдний нэг нь үнэнгээсээ буруутай бол гэмийг нь үүрүүлэх л байх. Гай зовлон хэлж ирэх биш. Гашуунаар хэлэхэд хэрэв үнэхээр гулгаанаас үүдэж уг осол гарсан бол давс цацаагүй хотын захиргаа л буруутах байх даа...

Л.Сайнаа