ЕТГ-ын дарга Г.Занданшатар Ерөнхий сайд болоод Засгийн газрын анхны хуралдаанаа 2025 оны 6 дугаар сарын 18-нд хийжээ. Тэр хуралдаанаараа “Төсөвт хэмнэлтийн тодотгол хийнэ” гээд хэлэлцэж байв. Түүнээс хойш Засгийн газрын 31 хуралдааны ард гарчээ.
Ерөнхий сайд Г.Занданшатар Засгийн газрын хурал болгоноо цочмог үгтэй лоозонгоор чимдэг. Гэвч тэдгээр лоозонгийнх нь дийлэнх ажил болж хэрэгжээгүй. Лоозон хэвээр үлдсэн.
Ер нь Г.Занданшатар Ерөнхий сайд болсноос хойших Засгийн газрын хуралдаанаар юу юу ярьж хэлэлцсэнийг эндээс болгооно уу.
2025.6.18.
Төр өөрөө бүсээ чангалах “Хэмнэлтийн тодотгол”-ыг Засгийн газар хэлэлцэж эхэллээ. Нэгдүгээрт, оновчтой бүтэцтэй, цомхон, чадварлаг төрийн албыг бий болгоно. Хоёрдугаарт, гэрээ байгуулагдаагүй төслүүдэд хуулиар заасны дагуу хэмнэлт хийнэ. Гуравдугаарт, төсвийн зардлыг нэмэгдүүлж буй салбарын хуулиудыг цэгцэлнэ.
2025.6.20.
-Дарга нарын тоог цөөлж, цомхон, чадвартай, үр ашигтай дарамт шахалтгүй хариуцлагатай төрийн бүтцийг бий болгоно
-Стратегийн ач холбогдол бүхий ашигт малтмалын ордын тусгай зөвшөөрөл эзэмшигчтэй хэлэлцээ хийнэ
2025.6.25.
-Яамдын газар, хэлтсийг нэгтгэх, чиг үүрэг давхацсан, шаардлагагүй нэгжийг хасах зэргээр яамдын бүтцийг цомхон, оновчтой тогтоох зарчмыг баримтлан нэгжүүдийг 31 хувиар бууруулахаар шийдвэрлэлээ.
-“Алт-3” аяныг орон даяар зарлан хэрэгжүүлэх, УИХ-ын тогтоолын төслийг УИХ-д өргөн барина.
2025.7.2.
Засгийн газрын агентлаг, төрийн өмчит үйлдвэрийн газар, компанийн чиг үүрэг, бүтэц, орон тоог цөөлнө.
2025.7.2.
-Засгийн газрын өргөтгөсөн хуралдаанаар төсвийн үр ашиггүй зардлыг танан, хэмнэлтийн горимыг чанд мөрдөх, Төрийн хэмнэлтийн тухай хуулийн дагуу гадаад томилолтыг хязгаарлаж, тансаглалыг таслан зогсоох талаар харьяа байгууллага, хуулийн этгээдийн удирдлагад үүрэг өгч, үр дүнг тооцож ажиллахыг анхаарууллаа.
Мөн аймаг, нийслэлийн хэмжээнд бизнес эрхлэгчдийг дэмжих, ажлын байрыг нэмэгдүүлэх чиглэлээр үүрэг даалгавар өглөө.
2025.7.3.
-Ой, хээрийн гал түймэртэй тэмцэх, шуурхай хариу арга хэмжээ авахад шаардлагатай 6,7 тэрбум төгрөгийг Засгийн газрын нөөц сангаас гаргана.
2025.7.7.
-“Засгийн газраас 100 хоногт багтаан хэрэгжүүлэх зарим арга хэмжээний тухай” Ерөнхий сайдын албан даалгаварт ард иргэдийн саналыг авна.
2025.7.9.
-Засгийн газраас шуурхай авч хэрэгжүүлэх зарим арга хэмжээний тухай Ерөнхий сайдын Албан даалгавар гарлаа.
-Засгийн газар “Эрдэнэс Тавантолгой” ХК-д Онцгой дэглэм тогтоолоо.
-Төслийн нэгжүүдийн орон тоог 200-гаар багасгаж, 11.5 тэрбум төгрөг хэмнэнэ.
2025.7.23.
-Орон сууцны санхүүжилтийн тусгайлсан банк байгуулна.
-“Антре гоулд” ХХК, "Петрочайна дачин тамсаг" ХХК, "Бадрах Энержи" ХХК зэрэг компанийн хөрөнгө оруулагчидтай хэлэлцээ хийнэ.
2025.7.30.
-2026 оны төсөв хүний хөгжил, боловсролыг дэмжих төсөв байх ёстойг Ерөнхий сайд онцлоод иргэд, татвар төлөгчдийн саналыг тусгахыг үүрэг болгов.
2025.8.6.
-Төрийн өмчит болон төрийн өмчийн оролцоотой 109 компанийг 87 болгоно.
2025.8.13.
-“Эрдэнэс Тавантолгой” ХК-д онцгой дэглэм тогтоосноос хойш нүүрсний экспорт нэмэгдэж байна.
2025.8.20.
-Нэг цонхны үйлчилгээг цахимжуулж, экспортыг нэмэгдүүлнэ.
-Засгийн газрын агентлагийн газар, хэлтэс, албаны даргын тоог 54-өөр цөөлөв.
2025.8.27.
-Төгрөг нуурын бүлэг ордыг төрд буцаан авлаа.
2025.9.2.
-“Газрын тос дамжуулах хоолойн төсөл”-ийн дэд бүтцийн ажилд шаардагдах түгээмэл тархацтай ашигт малтмал хайх, ашиглах талбайн солбицлыг тогтоов.
2025.9.10.
-Иргэдийн санал, санаачилгыг Засгийн газрын шийдвэрт тусгах цахим систем нэвтрүүллээ.
-Онцгой байдлын байгууллагын алба хаагчийн онцгой нөхцөлийн нэмэгдлийг 40 хувь болголоо.
-Биржийн нүүрсний экспорт 739 мянган тонн болж, өмнөх сараас хоёр дахин өслөө.
2025.9.11.
-Төмөртэйн овооны цайрын ордын тусгай зөвшөөрлийг албан тушаалтнууд хувийн компанидаа шилжүүлэн авсан үйлдлийн улмаас төрд учруулсан хохирлыг нэхэмжлэхээр боллоо.
2025.9.17.
-Мэдээллийн технологийн үйлдвэрлэлийг дэмжих виртуал бүс байгууллаа.
2025.9.24.
-Монгол Улсыг хөгжүүлэх таван жилийн үндсэн чиглэлд “Шинэ итгэл-Шинэтгэл”-ийг гол зорилго болголоо.
2025.10.1.
-Замын-Үүд, Эрээний эдийн засгийн хамтын ажиллагааны бүсийг хамтран хөгжүүлэх ерөнхий төлөвлөгөөг баталлаа.
2025.10.8.
-Нүүрстэй холбогдох гэрээ хэлэлцээ, бусад баримт бичгийг ил болголоо.
2025.10.15.
-Ерөнхий боловсролын цахим сургууль байгууллаа.
2025.10.22.
-Энхийг сахиулах ажиллагаанд үүрэг гүйцэтгэсэн бие бүрэлдэхүүнд олгох томилолтын хэмжээг нэмэгдүүллээ.
2025.10.28.
-Шатахуун олголтод тавьсан хязгаарлалтыг цуцаллаа.
2025.10.29.
-Багш, эмч нарын орон сууцны хүртээмжийг нэмэгдүүлэх асуудлыг судлах өргөтгөсөн ажлын хэсэг байгууллаа.
2025.11.5.
-“Эрдэнэс Тавантолгой” ХК-ийн сүүлийн гурван жилийн үйл ажиллагаанд аудит хийнэ.
2025.11.12.
-Албаны нууцыг хүчингүй болгож, төрийн 59 байгууллагын 882 мэдээллийг ил болгоно.
2025.11.24.
-Төрийн албан хаагчийн нэг удаагийн буцалтгүй тусламжийг хууль ёсны өвлөгчид нь олгохоор боллоо.
2025.11.28.
-Төрийн өмчит зарим компанийн удирдлагуудад хариуцлага тооцохыг чиглэл болголоо.
2025.12.3.
-Үнийн зохиомол өсөлтөөс сэргийлэх Шуурхай штаб байгууллаа.
2025.12.10.
-Төсвийн хөрөнгөөр шинэ жил, байгууллага болон салбарын ой тэмдэглэх зэрэг олон нийтийн арга хэмжээ зохион байгуулахгүй байхыг үүрэг болголоо.
Г.Занданшатарын Засгийн газар хагас жилд болсон 30 гаруй хуралдаанаар эдгээр шийдвэрийг гаргажээ.
Өөрөөр хэлбэл тэрээр “Хэмнэлт” ярьж ажлаа эхэлсэн. Харин өнөөдөр Засгийн газар нь хэмнэх ч мөнгөгүй болоод байна. Төсвийн байгууллагуудын цалингаас бусад бүх мөнгийг эргүүлэн татсан.
Ирэх 2026 оны 1 дүгээр сарын 25-наас багш нарын цалинг нэмнэ. Тэр нэмэгдэл дэнжигнэж буй эдийн засгийг нэгмөр хэвтүүлнэ. Үнэ өсөж, ханш савлахаар байгааг эдийн засагчид анхааруулж эхлээд байна.
О.Наранмандах
Сэтгэгдэл (20)