УИХ дахь Ардчилсан намын бүлэг мэдээлэл хийлээ. Энэ үеэр бүлгийн дарга О.Цогтгэрэл дараах мэдээллийг өглөө. 

Тэрбээр "АН-ын бүлгийн ээлжит хурлаар дараах асуудлыг хэлэлцлээ. Өнгөрсөн өдрүүдэд Оюутолгойн ордтой холбоотой сонсгол зохион байгуулагдсан. Уг сонсголын тайланг Түр хороо УИХ-аар хэлэлцүүлэх ёстой. Энэ сонсголын үйл ажиллагаанд Түр хороонд АН-ын бүлгээс төлөөлж оролцсон УИХ-ын гишүүд болох Жаргалан, Шижир, Бямбасүрэн нар тайлангийн талаарх мэдээллийг бүлэгт танилцуулж, өөрсдийн байр суурийг илэрхийллээ.

Мөн улс төрийн өнөөгийн нөхцөл байдалтай холбоотой асуудлыг хэлэлцсэн. Дэд сайдтай холбоотой асуудал сүүлийн өдрүүдэд нэлээд яригдаж байна. Гэхдээ АН-ын бүлгийн зүгээс дэд сайдын асуудал бол зүйрлэвэл мөсөн уулын орой л гэсэн үг. Ардчилсан нам өнгөрсөн хугацаанд төрийг цомхон, илүү үр ашигтай, илүү бүтээмжтэй болгох ёстой гэсэн байр суурийг тууштай баримталж ирсэн. Ингэснээр хувийн хэвшил, иргэдийн оролцоо эдийн засагт нэмэгдэнэ гэж бид үздэг. Төсөв, төсвийн тодотголтой холбоотой бүхий л асуудал дээр төсвийг танах, зардлыг хэмнэх санал санаачилгыг АН бүрэн дүүрэн дэмжиж ажиллаж ирсэн.

Гэтэл сүүлийн долоо хоногоос дэд сайдын асуудал яригдаж эхэлсэн нь нэгдүгээрт, орон тоо болон удирдах албан тушаалтны тоо нэмэгдэж байгаа хэрэг. АН-ын бүлгийн зүгээс тодорхой байр суурь илэрхийлсэн. Үүнд, яамдын тоог цомхон болгох, дэд сайдын томилгоог цуцлах шаардлагыг Засгийн газарт тавьж байна. Хэрэв энэ шаардлагыг биелүүлэхгүй бол Ардчилсан намын зүгээс Засгийн газар, Ерөнхий сайдыг огцруулах асуудлыг өргөн барина гэдгээ бид өнгөрсөн долоо хоногт мэдэгдсэн" гэв.