БОУАӨ-ийн сайд Б.Батбаатар цаг үеийн асуудлаар мэдээлэл өглөө.
Тэрбээр, "Иргэний Зориг Ногоон нам байгуулагдсан гол суурь шалтгаан нь тухайн үедээ шудрага ёсны хэмжээс алдагдлаа, шударга бус байдал бий боллоо гэсэн үндсэн суурь ойлголтоос үүссэн. Ингээд 2000 оны гуравдугаар сарын 9-ний өдөр анхдугаар хуралдаанаа хийж "Иргэний зориг" намыг байгуулж УИХ-ын сонгуульд орж байсан.
Энэ хугацаанд Иргэний зориг намд нэг бус нэлээн хэдэн нам хамтран нэгдсэн. 2011 онд Ногоон нам нэгдсэнээр "Иргэний Зориг Ногоон нам" гэдэг нэршилтэй болсон. Бид хоёр үндсэн тулах баганатай.
Нэгдүгээрт, ИЗНН шударга ёсны төлөөх ардчиллын төлөөх үндэсний үзэл бүхий нам. Хоёрдугаарт ногоон үзэл баримтлал, ногоон соёл иргэншил байгаль орчны тэргүүлэх үндсэн чиглэлтэй нам. Би 2023 оны ёсдүгээр сарын 9-нд хуралдсан намын их хурлаар "Намын дарга"-аар сонгогдож аравдугаар сард дээд шүүхийн шүүчдийн хуралдаанаар Батын Батбаатарыг ИЗНН даргаар бүртгэж авсан шийдвэр байдаг.
Нэр бүхий хүмүүс, тухайлбал Р.Батболд, Т.Бат-Эрдэнэ, М.Амартунгалаг, С.Батбаатар нарын гишүүд, иргэд зохион байгуулалттайгаар өчигдөр намын онц их хурал зарлана гэдэг зүйлийг хийсэн хэмээн мэдэгдсэн.
Тэрхүү дүрмийн бус үйл ажиллагаанд нь манай намын дэд дарга нар, дүүргийн намын дарга нар очиж хууль бус энэ ажлаа зогсоох шаардлагатай. Энгийн гишүүдээ төөрөгдүүлж ийм зүйл хийх нь буруу гэдгийг илэрхийлэхээр очсон" гэв.
