УИХ-ын Төрийн байгуулалтын байнгын хорооны хурал боллоо. Тус хуралд УИХ-ын 20 гишүүн оролцож хуралдааны ирц 62.5 хувьтай байв.
2026 оны гуравдугаар сарын 30-ны хуралдаанаар "УИХ-ын даргыг чөлөөлөх асуудал"-ын хэлэлцлээ. УИХ-ын дарга Н.Учрал үүрэгт ажлаасаа чөлөөлөгдөх хүсэлтээ танилцууллаа.
Тэрээр “Миний бие УИХ-ын гишүүдийн 82.5 хувийн саналаар 2025 оны арваннэгдүгээр сарын 20-ны өдрөөс УИХ-ын даргаар сонгогдон ажилласан. УИХ дахь олонхын бүлэг болох МАН-ын Бага хурлаас Ерөнхий сайдад нэр дэвшүүлэх улс төрийн шийдвэр гарсан. Иймээс тогтвортой байдал, үйл ажиллагааны тасралтгүй байдлыг хангах, парламентын дархлааг хадгалах, улс орны язгуур эрх ашгийг нэн тэргүүнд тавих үүднээс УИХ-ын даргын үүрэгт ажлаас өөрийн хүсэлтээр чөлөөлөгдөх хүсэлт гаргаж байна” хэмээн мэдэгдэв.
УИХ-ын гишүүн Д.Энхтуяа асуулт асууж, үг хэллээ. Тэрээр “МАН хэвлэлээр авлигатай эвлэрэхгүй гэж удаан хугацаанд ярьсан. Гэтэл одоо эвлэрэхгүй бус, харин бүр эвлэлдэн нэгдэж, схем зохиогоод, түүнийгээ өөрсдөө ч тайлбарлаж чадахгүй болсон юм биш үү. Ард түмэн авлига аваагүй, хулгай хийгээгүй. Харин хэн авлига авч, хулгай хийж байна вэ? Ард түмнээрээ тоглохоо боль” хэмээв.
УИХ-ын гишүүн Ө.Шижир асуулт асууж үг хэллээ. Тэрээр "Намын дарга Ерөнхий сайд болно гээд УИХ-ын даргын албан тушаалаа голж өргөдлөө өгч байгаа гэж ойлгож байна. Танай намын 100 жилийн түүхийг яриад яах вэ, сүүлийн 10 жилийг харъя. Намын дарга, УИХ-ын дарга байсан М.Энхболд яав, Ж.Эрдэнэбат яав, саяхан Л.Оюун-Эрдэнэ яав, Д.Амарбаясгалан дарга яав?
Таны хажууд байгаа хүмүүс 90, 90, 99 99 хувиар гуян дээр чинь алгадаж явуулчхаад араас нь хөл хориотой мэхээр боодог хүмүүс. Хоолойг чинь өчиг мэхээр боож ухаан алдуулж унагаагаад зоддог хүмүүс шүүдээ. Ийм нөхцөл байдалд бид сүүлийн нэг жил зургаан сарын хугацаанд байлаа. Монгол Улсын Их Хурлын гишүүн Үндсэн хуульд тангараг өргөдөг болохоос намын даргад тангараг өргөдөггүй гэдгийг хэлмээр байна. Өчигдөр би өөрийн нүдээр харлаа. Бага хурлын гадна Дорнод, Дархан, Архангай аймгийн Засаг дарга нарын машинууд байлаа. Намын хуралд яагаад төрийн машин унаж ирж, төрийн мөнгөөр шатахуун зарцуулж байгаа юм бэ? Энэ нь ёс зүйн зөрчил мөн үү? Бүтэн сайн өдөр төрийн алба ажиллаагүй, зөвхөн танай намын хурал болсон. Намын даргын хувьд энэ асуудалд хариулт өгнө үү” гэв.
