Засгийн газрын ээлжит хуралдаанаас гаргасан шийдвэрийг танилцуулж байна. Энэ үеэр ХХААХҮ-ийн сайд Ц.Идэрбат цаг үеийн асуудлаар мэдээлэл өглөө. 

Тэрбээр хэлэхдээ дотоодод үйлдвэрлэсэн бараа, бүтээгдэхүүнийг төрийн худалдан авалтад түлхүү хамруулах нь маш чухал болохыг онцлов. Удаан хугацаанд яригдаж ирсэн, үндэсний үйлдвэрлэгчид олон жил хүлээсэн энэ асуудлыг Засгийн газрын тогтоолоор албажуулсан бөгөөд зарим хуульд тусгагдсан заалтууд бодит амьдрал дээр хэрэгжих нөхцөл бүрдэж байгааг дурдлаа.

Мөн Жижиг, дунд үйлдвэрийн сангийн зарцуулалт, эргэн төлөлт зэрэг асуудлыг цэгцлэх, судлах үүрэг өгөгдсөн талаар мэдээлсэн юм. Түүнчлэн Ерөнхий сайдын санаачилсан “Чөлөөлье, санаачилья” аяны хүрээнд бизнес эрхлэгчид 140 гаруй төрлийн зөвшөөрлийг “e-business” платформоор дамжуулан цахимаар хүсдэг болох шийдвэр гарсныг онцоллоо.

Үүнээс гадна хаврын тариалалтын ажил эхэлж байгаатай холбогдуулан тодорхой тогтоол, албан даалгаврууд гарсан байна. Хаврын тариалалтад шаардлагатай 10 мянган тонн түлшийг 3400 төгрөгөөр тариаланчдад нийлүүлэх ажлыг эхлүүлсэн бөгөөд өнөөдрийн байдлаар 7000 гаруй тонн түлшийг газар тариалан эрхлэгчдэд хүргээд байгааг мэдээллээ.