Ардчилсан Намын Улс төрийн зөвлөлийн хурал боллоо. Хуралдаанаар дараах таван асуудлыг хэлэлцэн шийдвэрлэлээ.

Хуралдааны эхэнд Намын байгуулалтын бодлого хариуцсан Нарийн бичгийн дарга Л.Эрдэнэбулган Аймаг, нийслэл, сум, дүүргийн ИТХ-ын нөхөн сонгуулийн тухай мэдээллийг Улс төрийн зөвлөлийн гишүүдэд танилцуулав.

Дараа нь Ардчилсан Намын дарга О.Цогтгэрэл Ерөнхий нарийн бичгийн даргыг түр орлон гүйцэтгэгчийг томилох тухай асуудлыг танилцуулж, хэлэлцэн шийдвэрлүүлэв. Ардчилсан Намын Үндсэн дүрмийн 131.3-т заасны дагуу Ерөнхий нарийн бичгийн даргыг түр орлон гүйцэтгэгчээр С.Баярцогтыг томилуулахаар Улс төрийн зөвлөлийн хуралд санал оруулсныг хуралдаанд оролцсон нийт гишүүдийн 71.8 хувь нь дэмжсэнээр түр томилогдлоо. Ингэснээр Үндсэн дүрэмд заасны дагуу Үндэсний бодлогын хорооны хурлыг 30 хоног дотор зарлан хуралдуулж, Ерөнхий нарийн бичгийн даргыг томилуулах саналыг Ардчилсан Намын дарга О.Цогтгэрэл албан ёсоор оруулна.

Мөн хуралдаанаар Үндэсний бодлогын хорооноос батлахаар Үндсэн дүрэмд тусгагдсан зарим журмын төслийг хэлэлцэж, уг журмын төслүүдийг Үндэсний бодлогын хороонд оруулахад бэлтгэх үүрэгтэй ажлын хэсгийг Улс төрийн зөвлөлийн гишүүдийн хүрээнд байгуулж, төслийг гүйцээн найруулж боловсруулан дараагийн хуралд танилцуулахаар тогтлоо.

Үүний дараа Ардчилсан Намын дарга О.Цогтгэрэл УИХ дахь Ардчилсан Намын бүлгийн даргаас чөлөөлөгдөх хүсэлтээ Улс төрийн зөвлөлд танилцууллаа. Улс төрийн зөвлөлийн гишүүд Ардчилсан Намын даргын танилцуулгыг сонсож, тодорхой шийдвэр гаргахгүй байхаар тогтлоо.

Хуралдааны төгсгөлд Монгол Улсын Ерөнхийлөгчөөс өргөн барьсан УИХ-ын тухай хуульд нэмэлт өөрчлөлт оруулах тухай хуулийн төслийн талаар УИХ дахь Ардчилсан Намын бүлгээс гаргасан шийдвэрийг хэлэлцэж, гишүүд өөрсдийн байр суурийг илэрхийлж санал солилцлоо.