АНУ-ын холбооны шүүхээс санхүүч, бэлгийн хүчирхийллийн хэрэгт буруутгагдаж байсан Жеффри Эпштейний амиа хорлохынхоо өмнө бичсэн захидлыг олон нийтэд ил болгожээ. Уг захидал нь огноо, гарын үсэггүй бөгөөд жинхэнэ эсэх нь одоогоор албан ёсоор баталгаажаагүй байгаа юм.

Энэхүү захидлыг Эпштейний хуучин хорих өрөөний хамтрагч байсан, дөрвөн хүний амь насыг хөнөөсөн хэрэгт ял эдэлж буй экс цагдаа Николас Тартаглион олсон гэж мэдүүлжээ. Түүний хэлснээр Эпштейн 2019 оны долоодугаар сард амиа хорлох оролдлого хийснийхээ дараа захидлыг номын дотор нуусан байсан гэнэ.

Шүүхээс дэлгэсэн уг захидалд: “Тэд намайг хэдэн сарын турш шалгасан, юу ч олоогүй!!!", "Хэзээ баяртай гэж хэлэхээ өөрөө сонгоно гэдэг онцгой хэрэг” гэх мэт өгүүлбэрүүд бичигдсэн байжээ. Мөн “NO FUN – NOT WORTH IT!!” буюу “Ямар ч утгагүй — үнэ цэнгүй зүйл!” гэсэн үгс ч байсан талаар мэдээлжээ.

Шүүхийн шийдвэрийг Нью-Йорк Таймс сонин олон нийтэд ил болгох хүсэлт гаргасны дараа гаргасан байна. АНУ-ын Өмнөд Нью-Йоркийн дүүргийн шүүгч Кеннет Карас энэхүү баримт нь олон нийтийн сонирхлыг татахуйц гэж үзэн нууцаас гаргах зөвшөөрөл өгчээ. 

Гэхдээ АНУ-ын Хууль зүйн яам уг бичиг үнэхээр түүнийх эсэхийг мэдэхгүй гэж мэдэгдсэн байна. Тантаглионын өмгөөлөгчид гар бичмэлийг шинжээчээр шалгуулсан гэж мэдэгдсэн ч төрийн байгууллагууд албан ёсоор баталгаажуулаагүй байгаа аж.

Жеффри Эпштейн нь 2019 онд насанд хүрээгүй охидыг бэлгийн мөлжлөгт оруулсан, хүний наймааны зэрэг хэрэгт шүүгдэхээр хоригдож байх үедээ Нью-Йоркийн хорих ангид нас барсан юм. Нью-Йорк хотын шүүх эмнэлгийн шинжээчид түүний үхлийг амиа хорлолт гэж дүгнэсэн ч олон нийтийн дунд янз бүрийн хардлага, хуйвалдааны онолууд тасраагүй хэвээр байна.

Л.Баяр