АНУ, Ираны хооронд хэдэн сарын турш үргэлжилж буй мөргөлдөөн дахин эрчимжиж, хоёр тал шинэ цохилтууд хийлээ. АНУ-ын арми есдүгээр сарын 1-нд Ираны Исламын хувьсгалт гвардийн /IRGC/ байршлууд болон Ормузын хоолойн орчимд цэргийн ажиллагаа явуулсан байна. АНУ-ын Төв командлалын мэдээлснээр уг цохилтыг Ираны тал худалдааны хөлөг онгоц болон бүс нутаг дахь Америкийн цэргүүд рүү халдах оролдлого хийсэнтэй холбон тайлбарлажээ.

Үүний дараа Иран АНУ-ын цэргийн объектуудын эсрэг пуужин, дроны цохилт өгсөн байна. Ираны довтолгооны зарим пуужинг Йордан улс замд нь устгасан бол Бахрейн болон Йордан дахь АНУ-ын цэргийн баазууд бай болсон талаар мэдээлжээ. АНУ-ын тал Америкийн цэргүүд амиа алдсан гэх мэдээллийг үгүйсгэсэн байна.

АНУ-ын Ерөнхийлөгч Дональд Трамп Ираны эсрэг цохилтоо зөвтгөж, Тегеран хариу довтолгоогоо үргэлжлүүлбэл илүү хүчтэй арга хэмжээ авахыг анхааруулжээ. Харин Ираны Исламын хувьсгалт гварди Ормузын хоолойгоор дамжин өнгөрөх усан тээврийг цаашид хязгаарлах боломжтойг мэдэгдсэн байна.

Мөргөлдөөний хамгийн том нөлөөллийн нэг нь дэлхийн эрчим хүчний зах зээлд илэрч байна. Ормузын хоолойгоор дэлхийн газрын тос, шингэрүүлсэн байгалийн хийн нийлүүлэлтийн ойролцоогоор тавны нэг нь дамждаг. Гэвч есдүгээр сарын 1-нд тус хоолойгоор ердөө таван хөлөг онгоц нэвтэрсэн нь сүүлийн 10 хоногийн дунджаас эрс бага үзүүлэлт болжээ.

Үүний улмаас газрын тосны үнэ огцом өсөв. Есдүгээр сарын 2-ны өглөө Brent маркийн нефтийн үнэ нэг баррель нь 95.52 ам.доллар, WTI нефть 91.02 ам.долларт хүрч, өмнөх өдрийн өсөлтөө үргэлжлүүлсэн байна. Түүнчлэн Ормузын хоолойд Саудын Арабын газрын тос тээвэрлэж явсан хоёр супер танкер үл мэдэгдэх зэвсгийн халдлагад өртсөн нь нөхцөл байдлыг улам хүндрүүлжээ.

Л.Баяр