Нигерийн бүжигчин, бүжиг дэглээч Бенжамин Даниэл Габриэл долоо хоногийн турш тасралтгүй бүжиглэж, дэлхийн дээд амжилт тогтоохоор оролдож байна. Тэрбээр “Ben Dancer” нэрээрээ олонд танигдсан бөгөөд энэхүү оролдлогоороо бүжгийн урлаг төдийгүй Нигерийн соёл, хөгжмийг дэлхийд сурталчлах зорилготой аж. Бенжамин Даниэл есдүгээр сарын 22-нд Нигерийн Лагос хотын "Freedom Park"-д бүжгийн марафоноо эхлүүлсэн байна. Түүний зорилго нь нийт 168 цаг буюу долоон хоног тасралтгүй бүжиглэх юм.

Хэрэв тэр зорилтоо амжилттай биелүүлбэл хувь хүний хамгийн удаан үргэлжилсэн бүжгийн марафоны одоогийн 127 цагийн амжилтыг шинэчлэх боломжтой. Уг рекордыг Энэтхэгийн бүжигчин Срушти Судхир Жагтап 2023 онд тогтоосон бөгөөд тухайн үед тэр 16 настай байжээ.

Бенжамин Даниэлийн долоо хоногийн бүжгийн марафонд Нигерийн уламжлалт болон орчин үеийн хөгжмийн олон төрөл багтаж байна. Тэрээр афробит, фүжи, жазз, зоук зэрэг хөгжмийн хэмнэлд бүжиглэж, Нигерийн уламжлалт хувцсыг мөн үзүүлбэрийнхээ нэг хэсэг болгон ашиглажээ.

33 настай бүжигчин бүжгийн салбарт 18 жил ажилласан туршлагатай бөгөөд Bendancer Academy International-ийг үүсгэн байгуулсан байна. Тэрбээр бүжиг дэглээч, уран бүтээлийн зөвлөх, фитнесийн багш зэрэг чиглэлээр ажиллаж иржээ.

Ийм өндөр ачаалалтай марафоны үеэр түүний эрүүл мэндийг эмнэлгийн баг хянаж байгаа бөгөөд тодорхой хугацаанд богино хэмжээний амралт авах боломжтой аж. Бенжамин Даниэл уг оролдлогодоо бэлтгэхийн тулд биеийн тэсвэр, зүрх судасны ачааллыг нэмэгдүүлэх дасгал хийж, хооллолтдоо онцгой анхаарсан байна.

Түүний үзүүлбэрийг сонирхсон олон хүн "Freedom Park"-д цугларч, зарим нь бүжигчинтэй хамт бүжиглэн дэмжлэг үзүүлж байгаа бөгөөд үйл явдлын бичлэгүүд цахим орчинд тархжээ. Гэхдээ түүний 168 цагийн оролдлого Гиннесийн дэлхийн рекордын байгууллагаар албан ёсоор шинэ дээд амжилт болсон нь одоогоор баталгаажаагүй байна. Байгууллагаас тогтоосон бүх шаардлагыг хангасан эсэхийг шалгасны дараа эцсийн дүн гарах юм.

Л.Баяр