Францын нийслэл Парис болон бусад хотод амьжиргааны өртөг нэмэгдэж, боловсролын салбарын нөхцөл байдал муудсаныг эсэргүүцсэн олон нийтийн жагсаал болж, зарим газарт цагдаа болон жагсагчдын хооронд мөргөлдөөн гарчээ. Өнгөрөгч ням гарагт Франц даяар өрнөсөн жагсаалд эл Дотоод хэргийн сайд Лоран Нуньезийн мэдээлснээр, 550 мянга орчим хүн оролцсон байна. Үүнээс 110 мянга нь нийслэл Парис хотод жагсжээ. Харин жагсаал зохион байгуулагчид оролцогчдын тоог 800 мянгад хүрсэн гэж тооцоолсон байна.
Парисын гудамжинд цагдаа нар нулимс асгаруулагч хий ашиглаж, жагсагчдыг тараахыг оролдсон бол бусад хотод ч эсэргүүцлийн ажиллагаа өрнөсөөр байв. Ренн, Лион, Марсель зэрэг хотод жагсаал болж, зарим оролцогч төрийн байгууллагын барилга руу нэвтрэх, дэлгүүрүүдийг дээрэмдэх, эд хөрөнгө сүйтгэх зэрэг үйлдэл олноор гарсан байна.
Жагсаал юунаас эхэлсэн бэ?
Эсэргүүцлийн хөдөлгөөн есдүгээр сарын сүүлээр Парисын ажилчин ангийн дүүргүүдийн ахлах сургуулиудад эхэлжээ. Сурагчид багшийн хүрэлцээ муу, сургуулийн барилга байгууламжийн нөхцөл хангалтгүй байгааг эсэргүүцэн жагссан байна. Улмаар хөдөлгөөн өргөжиж, амьжиргааны өртөг нэмэгдсэн, нийгмийн тэгш бус байдал гүнзгийрсэн, төрийн үйлчилгээний чанар муудсан зэрэг асуудлыг хамрах болжээ. Жагсаалд ахлах болон их сургуулийн оюутнууд, үйлдвэрчний эвлэлийн төлөөлөгчид, мөн 2018 онд Францад өрнөсөн “Шар хантаазтан”-ы хөдөлгөөний зарим оролцогч нэгдсэн байна.
Парист зарим жагсагч тансаг зэрэглэлийн дэлгүүрүүдийн цонхыг хагалж, бараа бүтээгдэхүүнийг дээрэмдэж, автомашин болон бусад эд зүйлсийг шатаажээ. Лимож хотын захиргааны байр галд өртсөн бол Марсель хотод жагсагчид хотын захиргааны байранд нэвтэрч, эд хөрөнгө сүйтгэсэн байна. Лион хотын аялал жуулчлалын мэдээллийн төв ч галд өртжээ.
Францын Ерөнхий сайд Себастьян Лекорню жагсаалын үеэр гарсан хүчирхийллийг буруушааж, засгийн газар дарамтад автахгүй гэдгээ мэдэгдсэн байна. Тэрбээр аравдугаар сарын 17-ны оройны байдлаар 1200 орчим хүнийг баривчилсан бөгөөд цагдаа, жандармын 150 гаруй алба хаагч гэмтэж бэртсэн гэж мэдээлжээ.
Дотоод хэргийн сайд Лоран Нуньез хүчирхийллийн хэрэгт хэт зүүний үзэлтэй бүлэглэлүүд болон эмх замбараагүй байдал үүсгэгчдийг буруутгасан бол сөрөг хүчний зарим төлөөлөгч цагдаагийн ажиллагааг шүүмжилсэн байна. Мөн жагсаалын үеэр 17 настай нэгэн оролцогч тэсрэх хэрэгсэлд өртөж, гарандаа хүнд гэмтэл авсан тухай мэдээлжээ. Цагдаагийн хүч хэрэглэсэн ажиллагаатай холбоотой гомдлуудыг шалгаж эхэлсэн байна.
Энэ удаагийн эсэргүүцэл нь Францын Ерөнхийлөгч Эммануэль Макроны бүрэн эрхийн хугацаа дуусах дөхөж буй, ирэх онд болох ерөнхийлөгчийн сонгуулийн өмнөх улс төр, эдийн засгийн тодорхойгүй байдал нэмэгдсэн үед өрнөж байгаагаараа онцлог юм.
Л.Баяр
